Санаи 20-уми августи соли 2021 Асосгузори сулҳу ваҳдати миллӣ – Пешвои миллат, муҳтарам Эмомалӣ Раҳмон дар маросими ифтитоҳи иншооти Раёсати андоз дар шаҳри Душанбе ва Нозироти андоз дар ноҳияи Исмоили Сомонӣ иштирок намуд.



Муосиркунонии соҳаи андоз – яке аз самтҳои афзалиятноки фаъолияти мақомоти андоз буда, ҷиҳати беҳтарнамоии сатҳи хизматрасонӣ ба андозсупорандагон ва фароҳам овардани шароити мусоиду қулай ба шаҳрвандон ва беҳтар иҷро намудани уҳдадориҳои андозии онҳо пайваста диққати махсус зоҳир карда мешавад.



Айни замон, мақомоти андоз намудҳои зиёди хизматрасониҳои электрониро пешниҳод менамояд, аз ҷумла эъломияҳои андозӣ тариқи электронӣ пешниҳод карда мешаванд ва маълумотномаи лозима дар реҷаи онлайн дархост карда мешавад, инчунин ҳама гуна маълумотро метавон вобаста ба қонунгузории андоз дар сомонаи Кумитаи андоз дастрас намуд.



Иншооти замонавӣ бо тамоми таҷҳизоти муосир муҷаҳҳаз гардонида шудааст, ки мақомоти андозро ҳамчун яке аз мақомоти хизматрасонӣ дорои технологияҳои пешқадам муаррифӣ менамояд. Ин ба соддагардонии раванди ҳамгироӣ бо андозсупорандагон, бартараф намудани монеаҳои маъмурӣ ва ҷиҳати ташкили фазои мусоид баҳри рушди соҳибкорӣ ва иқтисоди ноҳия мусоидат хоҳад кард.



Дар иншоот барои андозсупорандагон тамоми нуқтаҳои функсионалӣ алалхусус, мизҳо барои тартиби ҳуҷҷатҳо, овезаҳои маълумотӣ ва дастрасӣ ба хизматрасониҳо баҳри қабули самараноки шаҳрвандон пешбинӣ шудааст.



Бояд қайд намуд, ки иншооти Раёсати андоз дар шаҳри Душанбе ва Нозироти андоз дар ноҳияи Исмоили Сомонӣ дар доираи омодагиҳо ба истиқболи ҷашни миллӣ 30 солагии Истиқлолияти давлатии Ҷумҳурии Тоҷикистон бунёд гардида, барои 110 нафар корманди соҳа, шахсони воқеӣ, ҳуқуқӣ ва соҳибкорони инфиродӣ шароити хуби кору хизматрасонӣ фароҳам оварда шудааст.

    Санаи 11 августи соли 2021 Раиси Кумитаи андози назди Ҳукумати Ҷумҳурии Тоҷикистон Давлатзода Нусратулло Муқим бо Гурӯҳи кории Хадамоти федералии андози Федератсияи Россия таҳти роҳбарии муовини роҳбари хадамот Шепелева Юлия Вячеславовна вохӯрӣ анҷом дод.

    Дар ҷараёни вохӯрӣ, ки дар фазои дӯстӣ ва ҳусни тафоҳум баргузор гардид, муовини роҳбари Хадамоти федералии андози Федератсияи Россия Шепелева Ю. В. ба Раиси Кумитаи андоз Давлатзода Н. М. барои меҳмоннавозӣ ва истиқболи гарму дӯстонаи ҳайати Россия изҳори сипос намуда, роҷеъ ба маҷмӯи масъалаҳои ҳамкориҳои дуҷониба, инчунин перомуни масъалаҳои расонидани кӯмаки техникӣ ба Кумитаи андози назди Ҳукумати Ҷумҳурии Тоҷикистон ҷиҳати рушди маъмурикунонии андоз дар Ҷумҳурии Тоҷикистон табодули афкор намуд.

    Кӯмаки техникии Хадамоти федералии андози Федератсияи Россия ба Кумитаи андоз ҷиҳати рушди маъмурикунонии андоз самтҳои зеринро дар бар мегирад:

    1) беҳтар намудани маъмурикунонии андоз аз арзиши иловашуда;

    2) мавриди истифода қарор додани онлайн кассаҳо (мошинҳои назоратӣ - хазинавии насли нав);

    3) баланд бардоштани самаранокии андозбандии молу мулки ғайриманқул ва манқул;

    4) таҳияи тавсияҳо оид ба такмили заминаи меъёрии ҳуқуқии маъмурикунонии андоз.

    Ҳамчунин, зимни вохӯриҳо баррасии лоиҳаи Созишнома байни Вазорати молияи Ҷумҳурии Тоҷикистон ва Вазорати молияи Федератсияи Россия оид ба расонидани кӯмаки техникӣ бо мақсади рушди маъмурикунонии андоз дар назар аст.

 Раёсати ҳамкориҳои байналмилалии

 Кумитаи андози назди Ҳукумати Ҷумҳурии Тоҷикистон

    Бо мақсади мубодилаи афкор ва таҷриба аз ҷониби Кумитаи андози назди Ҳукумати Ҷумҳурии Тоҷикистон дар мавзӯи “Рушди маъмурикунонии андоз дар Ҷумҳурии Тоҷикистон дар даврони рақамикунонӣ” бо намояндагони созмонҳои байналмилалии молиявӣ ва вазорату идораҳои давлатӣ вохӯрии маҷозӣ баргузор гардид.

    Дар вохӯрӣ 68 намояндагони вазорату идораҳо ва созмону ташкилотҳои байналмилалӣ иштирок намуданд.

    Аз ҷониби Кумитаи андози назди Ҳукумати Ҷумҳурии Тоҷикистон дар ин вохӯрӣ муовини якуми Раиси Кумитаи андоз - Солеҳзода Аюбҷон Маруф ва дигар кормандони Кумита иштирок намуданд.

    Аз ҷониби Солеҳзода А. М. қайд карда шуд, ки рақамикунонии маъмурикунонии андоз дар Ҷумҳурии Тоҷикистон бо тадриҷ тақвият меёбад ва он аз ҷониби андозсупорандагон мусбӣ баҳогузорӣ карда шудааст. Тибқи пурсишномаи назарсанҷии андозупорандагон, ки нимсолаи аввали соли 2021 аз ҷониби Бонки Умумиҷаҳонӣ гузаронида шуда буд, 82% пурсидашудагон иброз намудаанд, ки мақомоти андоз яке аз мақомоти эътимоднок дар Ҷумҳурии Тоҷикистон ба ҳисоб меравад. Аз чор се ҳиссаи ширкатҳо чунин мешуморанд, ки маъмурияти андоз одилона андозҳоро ҳисоб намуда, онҳоро меситонад. Тақрибан 80% пурсидашудагон боварӣ доранд, ки мақомоти андоз дар масъалаҳои андоз салоҳиятноканд.

    Ҳамчунин бояд ёдовар намуд, ки мақомоти андоз аз соли 2012 инҷониб эъломияҳои электронӣ барои содда кардани раванди пешниҳоди эъломияҳо ва коҳиш додани басомади ҳамкории андозсупорандагон бо мақомоти андоз ҷорӣ карда шудааст. Имрӯзҳо андозсупорандагони Тоҷикистон зиёда аз 60 намуди хизматрасонии электронӣ дастрасӣ доранд, ки шумораи онҳо тадриҷан меафзояд. Хизматрасониҳои электронӣ барои шахсони ҳуқуқӣ, соҳибкорони инфиродӣ, шахсони воқеӣ, бахши бонкӣ ва корхонаҳои давлатӣ пешбинӣ шудаанд.

    Дар ҷараёни вохӯрӣ, иштирокчиён, аз ҷумла Маликзода Н. С., муовини раиси Кумитаи андоз, Ян-Петер Олтерс, намояндаи доимии Бонки Умумиҷаҳонӣ дар Ҷумҳурии Тоҷикистон, Нормуродзода Фирдавс, сармутахассиси Дастгоҳи иҷроияи Президенти Ҷумҳурии Тоҷикистон, Карл Ҳайнз Ҳайдл намояндаи ташкилоти “Бизнес” дар СҲИР-(Созмони Ҳамкории Иқтисодӣ ва Рушд) ва як қатор намояндагони вазоратҳои идораҳои Ҷумҳурии Тоҷикистон, фикру андешаҳои худро вобаста ба рушди минбаъдаи рақамикунонии маъмурикунонии андоз дар Ҷумҳурии Тоҷикистон баён доштанд.

    Дар вохӯрӣ аз ҷониби Нормуродзода Фирдавс, қайд карда шуд, ки Ҳукумати Ҷумҳурии Тоҷикистон ҷиҳати мунтазам такмил додани маъмурикунонии андоз чораҳои зарурӣ меандешад, ки ин ба фазои сармоягузории Ҷумҳурии Тоҷикистон таъсири мусбат мерасонад. Маҳз бо шарофати татбиқи ҳамин чораҳо ва ислоҳот, тибқи гузориши Бонки Умумиҷаҳонӣ оид ба “Пешбурди тиҷорат-2020”, Ҷумҳурии Тоҷикистон ба қатори даҳгонаи кишварҳои ислоҳотгар дохил шуд.

    Инчунин, Ян-Петер Олтерс тазаккур дод, ки мақомоти андози Ҷумҳурии Тоҷикистон қадамҳои муҳим ҷиҳати беҳтар намудани маъмурикунонии андоз амалӣ намуда, дар роҳи мубаддал шудан ба як мақомоти муосири андози муваффақ шудааст.

    Илова бар ин, дар ҳамкорӣ бо ташкилоти “Бизнес” дар СҲИР корҳои созанда гузаронида шуда, дар як муддати кӯтоҳ 18 ширкатҳои бонуфузи ҷаҳонӣ, аз қабили Google, Facebook ва дигарон, ки хизматрасониҳои электрониро ба шахсони воқеии Ҷумҳурии Тоҷикистон пешниҳод менамоянд, худро ҳамчун супорандаи андоз аз арзиши иловашуда дар Кумитаи андози ба қайд гирифтанд.

    Дар фарҷоми вохӯрӣ Солеҳзода А. М. изҳори итминон кард, ки мулоқоти мазкур ба амалишавии кӯшишҳои муштарак оид ба рушд ва такмили маъмурикунонии андоз ва ҷорӣ намудани хизматрасониҳои навӣ электронӣ ҷиҳати боз ҳам сода ва мусоид намудани раванди хизматрасонӣ ба андозсупорандагон такони нав хоҳад дод.

    Тибқи маҳзани маълумоти Кумитаи андози назди Ҳукумати Ҷумҳурии Тоҷикистон ширкати хориҷии Apple Distribution International Limited, ки дар ҳудуди Ҷумҳурии Тоҷикистон ба шахсони воқеӣ хизматрасониҳои электрониро пешниҳод менамояд, санаи 16 июли соли 2021 аз байни чунин ширкатҳо нахустин шуда барои семоҳаҳои I ва II–и соли 2021 эъломияи андозии худро пешниҳод намуда, андоз аз арзиши иловашударо барои ин давраҳо ба маблағи зиёда аз 238.0 ҳазор сомонӣ ба буҷети давлатии Ҷумҳурии Тоҷикистон пардохт намуд.

    Вобаста ба ин ёдрас менамоем, ки тибқи муқаррароти қонуни Ҷумҳурии Тоҷикистон “Дар бораи ворид намудани тағйиру иловаҳо ба Кодекси андоз” аз 17 декабри соли 2020, ширкатҳои хориҷие, ки дар Ҷумҳурии Тоҷикистон ба шахсони воқеӣ хизматрасониҳои электрониро пешниҳод менамоянд, бояд тибқи тартиби муқарраршуда дар Кумитаи андоз ба қайд гирифта шуда, андоз аз арзиши иловашударо ҳисоб ва ба буҷет пардохт намоянд.

    Бо ин мақсадҳо дар соли ҷорӣ аз ҷониби мақомоти андоз бо намояндагони ширкатҳои хориҷӣ, ки дар Ҷумҳурии Тоҷикистон хизматрасониҳои электрониро анҷом медиҳанд, якчанд маротиба видеоконфронс ва корҳои фаҳмондадиҳӣ баргузор карда шуда, дар натиҷаи чораҳои андешидашуда 18 адад ширкатҳо ба мақомоти андоз муроҷиат намуда, ба қайд гирифта шуданд.

    Ширкати Apple Distribution International Limited нахустин ширкатест, ки аз ҳисоби хизматрасониҳои электронии анҷомдодаи худ дар нимсолаи якуми соли ҷорӣ эъломияи андоз пешниҳод намуда, маблағи онро ба буҷети давлатӣ пардохт намудааст.

    Бо ташаббуси Кумитаи андози назди Ҳукумати Ҷумҳурии Тоҷикистон бо мақсади фароҳам овардани робита ва ҳамкории доимии мутақобилан судманд байни мақомоти андоз ва андозсупорандагон мизи мудаввар дар мавзӯи "Муносибати шариконаи мақомоти андоз ва андозсупорандагон, ҳамчун қисми ислоҳоти андоз" доир гардид. Чорабинии мазкур санаи 2 июли соли 2021 дар бинои меҳмонхонаи «Hyatt Regency» баргузор гардид, ки дар он намояндагони вазорату идораҳои соҳаи иқтисод, аз он ҷумла вазоратҳои рушди иқтисод ва савдо, молия, Кумитаи давлатии сармоягузорӣ ва идораи амволи давлатӣ, Агентии омор, Бонки миллӣ, инчунин роҳбарон, сармуҳосибҳо ва таҳлилгарону кормандони масъули андозсупорандагон иштирок намуданд.

    Мавриди зикр аст, ки бо шарофати Истиқлоли давлатӣ, дар партави сиёсати хирадмандона ва роҳнамоиҳои Асосгузори сулҳу ваҳдати миллӣ–Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ислоҳоти андоз бо маром идома дошта, маъмурикунонии андозҳо нисбат ба солҳои қаблӣ беҳтар гардида истодааст. Ҳамзамон, базаи моддию техникии мақомоти андоз рўз аз рўз беҳтар гардида, шумораи хизматрасониҳои электронӣ зиёд ва сатҳи ҷорӣ кардани иқтисоди рақамӣ баланд гардида истодааст.

    Дар ҷараёни мизи мудаввар ҷанбаҳои муҳими муносибатҳои андозсупорандагон ва мақомоти андоз баррасӣ гардида, дар он Муовини якуми Раиси Кумитаи андоз Солехзода А.М. баромад кард.

    Ғайр аз он, худи андозсупорандагон ҳамчун баромадкунандагон бо маърӯзаҳои оиди муносибатҳои шариконаи мақомоти андоз ва андозсупорандагон баромад карданд.

    Сипас, иштирокчиёни мизи мудаввар оид ба рушди муносибати шариконаи мақомоти андоз бо андозсупорандагон, системаи маъмурикунии андоз, хизматрасониҳои электронӣ ва системаҳои иттилоотии Кумитаи андоз мубодилаи афкор намуданд. Ҳамзамон, дар идомаи мизи мудаввар иштирокчиён вобаста ба масъалаҳои муҳокимагардида таклифу пешниҳодҳои худро манзур намуданд.

    Аз ҷониби Кумитаи андоз дар оянда низ гузаронидани чунин чорабиниҳо ба нақша гирифта шудааст, ки баргузории онҳо ба баланд бардоштани сатҳи ҳамкории мақомоти андоз бо андозсупорандагон, беҳтар намудани фазои сармоягузорӣ ва рушди бахши хусусии иқтисодиёт равона гардида, дар нақшаи чорабиниҳои татбиқи амалии «Барномаи рушди маъмури-кунонии андоз» пешбинӣ гардидааст.