Санаи 3 майи соли 2022 вохӯрии маҷозии мутахассисони Кумитаи андози назди Ҳукумати Ҷумҳурии Тоҷикистон бо шахсони хориҷие, ки хизматрасониҳои фосилавиро ба шахсони воқеие, ки дар Ҷумҳурии Тоҷикистон қарор доранд, пешниҳод менамоянд (минбаъд Шахсони хориҷӣ) ва намояндаи Бизнес дар Созмони ҳамкории иқтисодӣ ва рушд Карл Ҳайнз Ҳайдл (минбаъд Карл Ҳайнз), баргузор гардид.

Ҳадаф аз ин вохӯрӣ ба таваҷҷуҳи шахсони хориҷӣ расонидани муқаррароти нави қонунгузории андоз дар бораи андозбандии хизматрасониҳои фосилавии шахсони хориҷӣ ва дигар муқаррароти дахлдори Кодекси андози Ҷумҳурии Тоҷикистон дар таҳрири нав буда, дар он аз Кумитаи андоз Маликзода Нарзулло Саймиддин - муовини Раиси Кумитаи андоз, Вазиров Собирҷон – муовини сардори Раёсати такмили қонунгузории андоз, Хайриддинов Умедҷон – муовини сардори Раёсати ҳамкории байналмилалӣ ва Бобоев Дилшод – директори КВД “Маркази барномасозии маъмурикунонии андоз” иштирок намуданд.

Муовини Раиси Кумитаи андози назди Ҳукумати Ҷумҳурии Тоҷикистон вохӯриро оғоз намуда, миннатдории худро барои иштирок дар вохӯрии маҷозӣ ба намояндагони Шахсони хориҷӣ ва Карл Ҳайнз баён намуд.

Маликзода Н. С. қайд кард, ки айни замон 21 Шахсони хориҷӣ худро дар Кумитаи андоз тавассути сомонаи расмии Кумита ба ҳисоб гузошта, тибқи эъломияҳои пешниҳодшуда дар давраи ҳисоботии соли 2021 ва семоҳаи 1-уми соли 2022 ба шахсони воқеии Ҷумҳурии Тоҷикистон ба маблағи 16,9 млн. сомонӣ хизматрасонии фосилавӣ пешниҳод намуда, аз он 2,8 млн. сомонӣ ААИ-ро нигоҳ дошта, ба буҷети Ҷумҳурии Тоҷикистон пардохт намуданд.

Иловатан, аз ҷониби Маликзода Н. С. вобаста ба муқаррароти Кодекси андози Ҷумҳурии Тоҷикистон дар таҳрир нав ва фарқияти он аз Кодекси андози қаблӣ маълумоти мухтасар пешниҳод намуд. Муқаррароти Кодекси андоз дар таҳрири нав мутобиқи таҷрибаи пешқадами ҷаҳонӣ такмил дода шудааст, ки ба ҳамаи субъектҳои хоҷагидор барои дарки муқаррароти он имкониятҳои баробар фароҳам оварда, мухолифат ва баҳсҳоро бартараф менамояд. Меъёри стандартии андоз аз арзиши иловашуда аз 18 то 15 фоиз паст карда шудааст.

Сипас, аз ҷониби муовини сардори Раёсати такмили қонунгузории андоз Вазиров С. вобаста ба хусусиятҳои андозбандии хизматрасонии фосилавии Шахсони хориҷӣ ва тағйиротҳо дар ин самт дар шакли рӯнамо бо забони англисӣ маълумоти муфассал пешниҳод гардид.

Баъдан, Карл Ҳайнз ва намояндагони Шахсони хориҷӣ, алалхусус Google ва Meta (собиқ Фейсбук), ва Booking.com вобаста ба мавзӯъҳои рӯзномаи ҷаласа саволҳои дахлдор пешниҳод намуданд, ки ба саволҳои онҳо Маликзода Н. С. ҷавобҳои мушаххас пешниҳод намуд.

Дар интиҳои вохӯрӣ, намояндагони Шахсони хориҷии номбурда миннатдории худро ба Роҳбарияти Кумитаи андоз барои ба инобат гирифтани пешниҳодҳои онҳо дар лоиҳаи Кодекси андози Ҷумҳурии Тоҷикистон дар таҳрири нав, кӯмакҳои саривақтӣ ва ҳамкории пурсамар баён намуда, қайд намуданд, ки фаъолияти Кумитаи андози назди Ҳукумати Ҷумҳурии Тоҷикистонро дар муқоиса бо таҷрибаи байналмилалӣ яке аз беҳтаринҳо ба ҳисоб рафта, нисбат ба дархосту муроҷиатҳои онҳо кормандони Кумитаи андоз сари вақт маълумоти заруриро пешниҳод намуда, ҳангоми зарурият чораҷӯӣ менамоянд.

Илова бар ин, намояндагони Шахсони хориҷӣ нисбат ба истифодабарии сомонаи Кумитаи андоз ва утоқи шахсӣ баҳои баланд дода, онҳоро дар истифода хеле қуллай ва осон арзёбӣ намуданд.

    Кумитаи андози назди Ҳукумати Ҷумҳурии Тоҷикистон ба маълумоти Шумо мерасонад, ки бо назардошти мутобиқ ба Кодекси андоз омода гардидани қарори Ҳукумати Ҷумҳурии Тоҷикистон “Дар бораи Қоидаҳои андозбандии соҳибкорони инфиродие, ки дар асоси патент ё шаҳодатнома фаъолият менамоянд” индексатсияи маблағҳои устувори патент барои соли 2022 дар назар дошта нашудааст.

Бинобар ин, Шуморо зарур аст, ки маблағҳои патент аз рўи меъёрҳои дар соли 2021 амалкунанда ба буҷет пардохт намуда, доир ба иҷрои уҳдадории андозии худ бо нозироти андози маҳалли қайди худ санади муқоисавӣ тартиб диҳед.

    20 январи соли 2021 дар Сафорати Ҷумҳурии Тоҷикистон дар Федератсияи Русия семинар-машварат тариқи рӯнамоӣ оид ба «Кодекси андози Ҷумҳурии Тоҷикистон дар таҳрири нав» дар шакли ҳузурӣ ва маҷозӣ баргузор гардид. Дар ин чорабинӣ кормандони Кумитаи андози назди Ҳукумати Ҷумҳурии Тоҷикистон, соҳибкорони тоҷики муқими Федератсияи Русия, намояндагони Консулгариҳои генералӣ ва дигар намояндагони мақомоти давлатии Ҷумҳурии Тоҷикистон дар Федератсияи Россия иштирок намуданд.

Чорабинии мазкурро Роҳбари намояндагии дипломатӣ, Сафири Фавқулода ва Мухтори Ҷумҳурии Тоҷикистон дар Федератсияи Россия Давлатшоҳ Гулмаҳмадзода ифтитоҳ намуда, оид ба ҳадафҳои қабули Кодекси андози Ҷумҳурии Тоҷикистон дар таҳрири нав суханронӣ намуд.

Сафир изҳор дошт, ки Кодекси нави андози Ҷумҳурии Тоҷикистон ба дастгирии фаъолияти соҳибкорӣ ва ҷалби сармояи хориҷӣ ва дохилӣ ба иқтисодиёти Ҷумҳурии Тоҷикистон нигаронида шуда, аз соҳибкорони тоҷики муқими Россия даъват ба амал овард, ки ба соҳаҳои иқтисодиёти Ҷумҳурии Тоҷикистон фаъолона сармоягузорӣ намоянд.

Сипас муовини якуми Раиси Кумитаи андози назди Ҳукумати Ҷумҳурии Тоҷикистон Аюбҷон Солеҳзода оид ба Кодекси андози Ҷумҳурии Тоҷикистон дар таҳрири нав баромад намуд.

Қайд карда шуд, ки ҳадаф аз қабули Кодекси андоз дар Ҷумҳурии Тоҷикистон дар таҳрири нав, ин таъмини рушди устувори иқтисодии кишвар тавассути фароҳам овардани фазои мусоиди соҳибкорӣ ва сармоягузорӣ, қабл аз ҳама ба соҳибкории истеҳсолӣ, ҷорӣ намудани технологияҳои рақамӣ ва таҳкими афзоиши манбаъхои нави андозбандӣ ва даромади буҷаи давлатӣ мебошад.

Зикр гардид, ки таҳрири нави Кодекси андоз бо назардошти таҷрибаи пешқадами ҷаҳонӣ ва бо назардошти принсипи муайянии андозӣ таҳия шудааст, ки ба ҳамаи субъектҳои соҳибкорӣ барои дарки муқаррароти он имкониятҳои баробар фароҳам оварда, ихтилофот ва баҳсҳоро бартараф менамояд.

Тибқи муқаррароти Кодекси андози Ҷумҳурии Тоҷикистон дар таҳрири нав, андоз аз истифодабарандагони роҳҳои автомобилгард аз рӯйхати андозҳо хориҷ карда шуда, шумораи умумии андозҳо аз 10 намуд ба 7 намуд кам карда шуд.

Меъёри андоз аз арзиши иловашуда аз 18 то 15 фоиз кам карда шуда, дар назар аст, ки дар давраи то соли 2027 меъёри ин андоз то 13 фоиз кам карда шавад.

Дар таҳрири нави Кодекси андоз меъёрҳои андоз аз даромади шахсони воқеӣ бекор карда шуда, меъёри ягонаи 12 фоиза муқаррар карда шудааст.

Дар Кодекси андоз барои корхонаҳои истеҳсолӣ меъёри андоз аз даромад 13 фоиз, барои муассисаҳои молиявӣ ва ширкатҳои мобилӣ аз 23 фоиз ба 20 фоиз ва дигар намудҳои фаъолият аз 23 фоиз ба 18 фоиз кам карда шудааст. Меъёри андози иҷтимоӣ барои суғуртакунандагон аз 25 фоиз ба 20 фоиз кам карда шуд.

Дар интиҳо миёни ширкаткунандагон суҳбату табодули афкори судманд сурат гирифта, аз ҷониби иштирокдорон як қатор саволҳо ба миён гузошта шуданд, ки ба онҳо Аюбҷон Солеҳзода посухҳои муфассал дод.