Санаи 27 сентябри соли 2021 Раиси Кумитаи андози назди Ҳукумати Ҷумҳурии Тоҷикистон Нусратулло Давлатзода бо ходимони илмии Маркази сиёсати андози Пажӯҳишгоҳи молиявии илмию тадқиқотии Вазорати молияи Федератсияи Россия вохӯрии судманд анҷом дод. Дар вохӯрӣ Лазарян Самвел Сергеевич – роҳбари самтҳои барномаҳои ҳамкории байналмилалӣ, сардори Маркази тадқиқоти макроиқтисодӣ, Шаталов Сергей Дмитриевич – мушовири директори Пажӯҳишгоҳи молиявии илмию тадқиқотӣ, Пинская Миляуша Рашитовна – роҳбари Маркази сиёсати андоз ва дигар ходимони Пажӯҳишгоҳ иштирок намуданд. Мақсади вохӯрӣ – мубодилаи таҷриба байни мақомотҳои марбутаи давлатӣ ва ба роҳ мондани семинарҳои омӯзишӣ дар мавзӯъҳои дурнамосозии даромади буҷети давлатӣ, рушди бозори қоғазҳои қиматнок ва сиёсати андозро дарбар мегирад. Инчунин, ҷонибҳо вобаста ба Лоиҳаи Кодекси андоз дар таҳрири нав, таъсири он ба ҷалби сармояи хориҷӣ ва рушди самтҳои гуногуни иқтисодии миллии Ҷумҳурии Тоҷикистон мубодилаи афкор намуданд. Дар фарҷоми вохӯрӣ, ҷонибҳо омодагии худро ҷиҳати густариш додани њамкорињои минбаъда бо мақсади беҳтар намудани маъмурикунонии андоз дар Ҷумҳурии Тоҷикистон изҳор намуданд.

    Санаи 23-юми сентябри соли 2021 Асосгузори сулҳу ваҳдати миллӣ – Пешвои миллат, муҳтарам Эмомалӣ Раҳмон ва Раиси Кумитаи андози назди Ҷумҳурии Тоҷикистон дар маросими ифтитоҳи иншоотҳо, аз ҷумла иншооти БДА «Амонатбанк», Осорхонаи таърихию кишваршиносӣ, Мақомоти иҷроияи ҳокимияти давлатӣ, Варзишгоҳи марказӣ, майдони Парчам ва Нишони давлатӣ дар ноҳияи Балҷувон иштирок намуданд.

    Дар бинои филиали Бонки давлатии амонатгузории Ҷумҳурии Тоҷикистон «Амонатбонк» дар ноҳияи Балҷувон амалиёти гуногуни бонкӣ, аз қабили кушодани суратҳисоби бонкӣ, интиқол ва гирифтани маблағ, пардохти хизматрасониҳо ва гирифтани қарзҳо ба роҳ монда шудааст.

    Осорхонаи таърихию кишваршиносии ноҳияи Балҷувон ҷиҳати дар руҳияи ватандӯстиву ватанпарастӣ, арҷгузорӣ ба таърихи пурғановати миллат ва шинохти шахсиятҳои таърихии халқи тоҷик тарбия намудани насли наврасу ҷавон мусоидат мекунад. Зеро дар ин ҷо аз давлатдорӣ, муборизаву ҷоннисоркуниҳои фарзандони барӯманди миллат, аз ҷумла Исмоили Сомонӣ, Спитамен, Муқаннаъ, Сумбоди Муғ, Деваштич, Абӯмуслими Хуросонӣ, Яъқуби Лайс, Темурмалик, Восеъ ва садҳо нафари дигар маълумоти зиёд маҳфуз мебошад.

    Тамоми ҳуҷраҳои кории бинои нави Мақомоти иҷроияи ҳокимияти давлатӣ бо дастгоҳу таҷҳизоти корӣ таъмин буда, барои фаъолияти пурсамари кормандон бисёр созгор аст. Дар бинои нав ҳамзамон толори маҷлис бо 150 ҷойи нишаст мавҷуд мебошад, ки барои баргузории чорабиниҳои гуногун ба нақша гирифта шудааст. Ҳуҷраҳои кории шуъбаю бахшҳои дастгоҳ ва мақомот ва бойгонӣ дар ошёнаи якуми бино ҷойгир буда, ҳуҷраҳои кории роҳбарияти ноҳия, дастгоҳи раиси ноҳия ва муовинон бо тамоми лавозимоти корӣ дар ошёнаи дуюм муҷаҳҳаз мебошанд.

    Мавриди истифода қарор гирифтани варзишгоҳ дар самти ташкили тамринҳои ҳаррӯза, баргузории мусобиқаҳои гуногуни ноҳиявию вилоятӣ, чорарабиниҳои фарҳангии сатҳи баланд, тарғибу ташвиқи тарзи ҳаёти солим ва оммавигардонии варзиш дар миёни сокинон имкони васеъ фароҳам овард.

    Масоҳати умумии майдони Парчам ва Нишони давлатӣ 7200 метри мураббаъро ташкил дода, барои сайру гашт ва истироҳати сокинону меҳмонон, инчунин гузаронидани чорабиниҳои оммавии фарҳангӣ-фароғатӣ ва машқҳои пагоҳирӯзӣ мусоид мебошад.

Санаи 20-уми августи соли 2021 Асосгузори сулҳу ваҳдати миллӣ – Пешвои миллат, муҳтарам Эмомалӣ Раҳмон дар маросими ифтитоҳи иншооти Раёсати андоз дар шаҳри Душанбе ва Нозироти андоз дар ноҳияи Исмоили Сомонӣ иштирок намуд.



Муосиркунонии соҳаи андоз – яке аз самтҳои афзалиятноки фаъолияти мақомоти андоз буда, ҷиҳати беҳтарнамоии сатҳи хизматрасонӣ ба андозсупорандагон ва фароҳам овардани шароити мусоиду қулай ба шаҳрвандон ва беҳтар иҷро намудани уҳдадориҳои андозии онҳо пайваста диққати махсус зоҳир карда мешавад.



Айни замон, мақомоти андоз намудҳои зиёди хизматрасониҳои электрониро пешниҳод менамояд, аз ҷумла эъломияҳои андозӣ тариқи электронӣ пешниҳод карда мешаванд ва маълумотномаи лозима дар реҷаи онлайн дархост карда мешавад, инчунин ҳама гуна маълумотро метавон вобаста ба қонунгузории андоз дар сомонаи Кумитаи андоз дастрас намуд.



Иншооти замонавӣ бо тамоми таҷҳизоти муосир муҷаҳҳаз гардонида шудааст, ки мақомоти андозро ҳамчун яке аз мақомоти хизматрасонӣ дорои технологияҳои пешқадам муаррифӣ менамояд. Ин ба соддагардонии раванди ҳамгироӣ бо андозсупорандагон, бартараф намудани монеаҳои маъмурӣ ва ҷиҳати ташкили фазои мусоид баҳри рушди соҳибкорӣ ва иқтисоди ноҳия мусоидат хоҳад кард.



Дар иншоот барои андозсупорандагон тамоми нуқтаҳои функсионалӣ алалхусус, мизҳо барои тартиби ҳуҷҷатҳо, овезаҳои маълумотӣ ва дастрасӣ ба хизматрасониҳо баҳри қабули самараноки шаҳрвандон пешбинӣ шудааст.



Бояд қайд намуд, ки иншооти Раёсати андоз дар шаҳри Душанбе ва Нозироти андоз дар ноҳияи Исмоили Сомонӣ дар доираи омодагиҳо ба истиқболи ҷашни миллӣ 30 солагии Истиқлолияти давлатии Ҷумҳурии Тоҷикистон бунёд гардида, барои 110 нафар корманди соҳа, шахсони воқеӣ, ҳуқуқӣ ва соҳибкорони инфиродӣ шароити хуби кору хизматрасонӣ фароҳам оварда шудааст.

    Санаи 11 августи соли 2021 Раиси Кумитаи андози назди Ҳукумати Ҷумҳурии Тоҷикистон Давлатзода Нусратулло Муқим бо Гурӯҳи кории Хадамоти федералии андози Федератсияи Россия таҳти роҳбарии муовини роҳбари хадамот Шепелева Юлия Вячеславовна вохӯрӣ анҷом дод.

    Дар ҷараёни вохӯрӣ, ки дар фазои дӯстӣ ва ҳусни тафоҳум баргузор гардид, муовини роҳбари Хадамоти федералии андози Федератсияи Россия Шепелева Ю. В. ба Раиси Кумитаи андоз Давлатзода Н. М. барои меҳмоннавозӣ ва истиқболи гарму дӯстонаи ҳайати Россия изҳори сипос намуда, роҷеъ ба маҷмӯи масъалаҳои ҳамкориҳои дуҷониба, инчунин перомуни масъалаҳои расонидани кӯмаки техникӣ ба Кумитаи андози назди Ҳукумати Ҷумҳурии Тоҷикистон ҷиҳати рушди маъмурикунонии андоз дар Ҷумҳурии Тоҷикистон табодули афкор намуд.

    Кӯмаки техникии Хадамоти федералии андози Федератсияи Россия ба Кумитаи андоз ҷиҳати рушди маъмурикунонии андоз самтҳои зеринро дар бар мегирад:

    1) беҳтар намудани маъмурикунонии андоз аз арзиши иловашуда;

    2) мавриди истифода қарор додани онлайн кассаҳо (мошинҳои назоратӣ - хазинавии насли нав);

    3) баланд бардоштани самаранокии андозбандии молу мулки ғайриманқул ва манқул;

    4) таҳияи тавсияҳо оид ба такмили заминаи меъёрии ҳуқуқии маъмурикунонии андоз.

    Ҳамчунин, зимни вохӯриҳо баррасии лоиҳаи Созишнома байни Вазорати молияи Ҷумҳурии Тоҷикистон ва Вазорати молияи Федератсияи Россия оид ба расонидани кӯмаки техникӣ бо мақсади рушди маъмурикунонии андоз дар назар аст.

 Раёсати ҳамкориҳои байналмилалии

 Кумитаи андози назди Ҳукумати Ҷумҳурии Тоҷикистон

    Бо мақсади мубодилаи афкор ва таҷриба аз ҷониби Кумитаи андози назди Ҳукумати Ҷумҳурии Тоҷикистон дар мавзӯи “Рушди маъмурикунонии андоз дар Ҷумҳурии Тоҷикистон дар даврони рақамикунонӣ” бо намояндагони созмонҳои байналмилалии молиявӣ ва вазорату идораҳои давлатӣ вохӯрии маҷозӣ баргузор гардид.

    Дар вохӯрӣ 68 намояндагони вазорату идораҳо ва созмону ташкилотҳои байналмилалӣ иштирок намуданд.

    Аз ҷониби Кумитаи андози назди Ҳукумати Ҷумҳурии Тоҷикистон дар ин вохӯрӣ муовини якуми Раиси Кумитаи андоз - Солеҳзода Аюбҷон Маруф ва дигар кормандони Кумита иштирок намуданд.

    Аз ҷониби Солеҳзода А. М. қайд карда шуд, ки рақамикунонии маъмурикунонии андоз дар Ҷумҳурии Тоҷикистон бо тадриҷ тақвият меёбад ва он аз ҷониби андозсупорандагон мусбӣ баҳогузорӣ карда шудааст. Тибқи пурсишномаи назарсанҷии андозупорандагон, ки нимсолаи аввали соли 2021 аз ҷониби Бонки Умумиҷаҳонӣ гузаронида шуда буд, 82% пурсидашудагон иброз намудаанд, ки мақомоти андоз яке аз мақомоти эътимоднок дар Ҷумҳурии Тоҷикистон ба ҳисоб меравад. Аз чор се ҳиссаи ширкатҳо чунин мешуморанд, ки маъмурияти андоз одилона андозҳоро ҳисоб намуда, онҳоро меситонад. Тақрибан 80% пурсидашудагон боварӣ доранд, ки мақомоти андоз дар масъалаҳои андоз салоҳиятноканд.

    Ҳамчунин бояд ёдовар намуд, ки мақомоти андоз аз соли 2012 инҷониб эъломияҳои электронӣ барои содда кардани раванди пешниҳоди эъломияҳо ва коҳиш додани басомади ҳамкории андозсупорандагон бо мақомоти андоз ҷорӣ карда шудааст. Имрӯзҳо андозсупорандагони Тоҷикистон зиёда аз 60 намуди хизматрасонии электронӣ дастрасӣ доранд, ки шумораи онҳо тадриҷан меафзояд. Хизматрасониҳои электронӣ барои шахсони ҳуқуқӣ, соҳибкорони инфиродӣ, шахсони воқеӣ, бахши бонкӣ ва корхонаҳои давлатӣ пешбинӣ шудаанд.

    Дар ҷараёни вохӯрӣ, иштирокчиён, аз ҷумла Маликзода Н. С., муовини раиси Кумитаи андоз, Ян-Петер Олтерс, намояндаи доимии Бонки Умумиҷаҳонӣ дар Ҷумҳурии Тоҷикистон, Нормуродзода Фирдавс, сармутахассиси Дастгоҳи иҷроияи Президенти Ҷумҳурии Тоҷикистон, Карл Ҳайнз Ҳайдл намояндаи ташкилоти “Бизнес” дар СҲИР-(Созмони Ҳамкории Иқтисодӣ ва Рушд) ва як қатор намояндагони вазоратҳои идораҳои Ҷумҳурии Тоҷикистон, фикру андешаҳои худро вобаста ба рушди минбаъдаи рақамикунонии маъмурикунонии андоз дар Ҷумҳурии Тоҷикистон баён доштанд.

    Дар вохӯрӣ аз ҷониби Нормуродзода Фирдавс, қайд карда шуд, ки Ҳукумати Ҷумҳурии Тоҷикистон ҷиҳати мунтазам такмил додани маъмурикунонии андоз чораҳои зарурӣ меандешад, ки ин ба фазои сармоягузории Ҷумҳурии Тоҷикистон таъсири мусбат мерасонад. Маҳз бо шарофати татбиқи ҳамин чораҳо ва ислоҳот, тибқи гузориши Бонки Умумиҷаҳонӣ оид ба “Пешбурди тиҷорат-2020”, Ҷумҳурии Тоҷикистон ба қатори даҳгонаи кишварҳои ислоҳотгар дохил шуд.

    Инчунин, Ян-Петер Олтерс тазаккур дод, ки мақомоти андози Ҷумҳурии Тоҷикистон қадамҳои муҳим ҷиҳати беҳтар намудани маъмурикунонии андоз амалӣ намуда, дар роҳи мубаддал шудан ба як мақомоти муосири андози муваффақ шудааст.

    Илова бар ин, дар ҳамкорӣ бо ташкилоти “Бизнес” дар СҲИР корҳои созанда гузаронида шуда, дар як муддати кӯтоҳ 18 ширкатҳои бонуфузи ҷаҳонӣ, аз қабили Google, Facebook ва дигарон, ки хизматрасониҳои электрониро ба шахсони воқеии Ҷумҳурии Тоҷикистон пешниҳод менамоянд, худро ҳамчун супорандаи андоз аз арзиши иловашуда дар Кумитаи андози ба қайд гирифтанд.

    Дар фарҷоми вохӯрӣ Солеҳзода А. М. изҳори итминон кард, ки мулоқоти мазкур ба амалишавии кӯшишҳои муштарак оид ба рушд ва такмили маъмурикунонии андоз ва ҷорӣ намудани хизматрасониҳои навӣ электронӣ ҷиҳати боз ҳам сода ва мусоид намудани раванди хизматрасонӣ ба андозсупорандагон такони нав хоҳад дод.