Бо ибтикори Кумитаи андози назди Ҳукумати Ҷумҳурии Тоҷикистон санаи 22-юми декабри соли 2025 дар меҳмонхонаи “Кроун-Плаза”-и пойтахт ҷаласаи муштараки Кумитаи ҳамоҳангсозии Амалиёт оид ба ислоҳоти андоз ва Шӯрои машваратии андозсупорандагон доир гашт.

Чорабинӣ ба мавзуи муҳим - татбиқ ва дастовардҳои Лоиҳаи “Амалиёти ислоҳоти андоз ва дурнамои рушди рақамикунонии соҳаи андоз дар Тоҷикистон” бахшида шуда, дар он намояндагони вазорату идораҳои гуногуни давлатӣ, ташкилотҳои хориҷӣ, ширкатҳои ватанӣ ва ассотсиатсиятҳои соҳибкорон иштирок доштанд.

Чорабиниро Солеҳзода Аюбҷон Маъруф, муовини аввали раиси Кумитаи андози назди Ҳукумати Ҷумҳурии Тоҷикистон бо сухани муқаддимавӣ ифтитоҳ намуда, баъдан оид ба рафти татбиқи Барномаи амалиёти ислоҳоти андоз дар ҷумҳурӣ маълумот доданд. Зикр гардид, ки Лоиҳаи “Амалиёт оид ба ислоҳоти андоз” ва дурнамои рушди рақамикунонии соҳаи андоз дар Тоҷикистон, ки бо дастгирии Бонки ҷаҳонӣ амалӣ мегардад, ба иҷрои ҳадафҳои Стратегияи миллии рушди кишвар то соли 2030, Барномаи рушди маъмурикунонии андоз барои солҳои 2020-2025 ва Консепсияи иқтисоди рақамӣ равона гардида, ба ташкили низоми самаранок, шаффоф ва пешгӯишавандаи андоз, таҳкими устувории молиявии давлат, баланд бардоштани ҷолибияти сармоягузорӣ ва рушди соҳибкорӣ нигаронида шудааст.

Лоиҳаи мазкур ба баланд бардоштани сифати хизматрасониҳои давлатӣ дар соҳаи андоз, ҷорӣ намудани платформаҳои муосири рақамӣ ва низомҳои автоматикунонидашудаи идоракунии андоз мусоидат менамояд.

“Амалиёт оид ба ислоҳоти андоз” ва дурнамои рушди рақамикунонии соҳаи андоз дар Тоҷикистон ба афзоиши устувори даромадҳои буҷети давлатӣ тавассути таҳкими интизоми андоз, васеъ намудани манбъҳои андозбандӣ ва баланд бардоштани самаранокии институтсионалии мақомоти андоз шароит фароҳам меорад. Ҳадаф аз татбиқи лоиҳаи мазкур ташаккули низоми шаффофу самараноки андоз, фароҳам овардани шароити мусоид баҳри фаъолияти соҳибкорӣ ва баланд бардоштани сатҳи риояи ихтиёрии қонунгузории андоз мебошад,-гуфт Аюбҷон Солеҳзода ва таъкид намуд, ки сиёсати андоз имрӯз дар тамоми ҷаҳон тағйир ёфта, бидуни гузаронидани ислоҳот рушди ин соҳаи муҳим ғайриимкон мебошад.

Дар чорабинӣ ҳамчунин Восидиён Фарҳод, муовини вазири рушди иқтисод ва савдои Тоҷикистон суханронӣ намуда, оид ба натиҷаҳои ҳамоҳангсозии татбиқи барномаи маъмурикунонии андоз ва лоиҳаҳои ислоҳотии андоз бо мақомоти давлатӣ маълумот дод.

“Натиҷаҳои мониторинги лоиҳа нишон дод, ки Кумитаи андоз дар самти рақамикунонии соҳа ба дастовардҳои назаррас ноил гаштааст. Истифода аз барномаю модулҳои компютерӣ, зеҳни сунъӣ ва ҷорӣ намудани хизматрасониҳои зиёди электронӣ барои андозсупорандагон боиси шаффоф гаштани низоми андоз ва коҳиш ёфтани сатҳи иқтисоди пинҳонӣ гаштааст”,- гуфт зимни суханронии хеш Фарҳод Восидиён.

Дар чорабинӣ намояндагони Бонки ҷаҳонӣ ширкат доштанд ва аз натиҷаҳои лоиҳа изҳори қаноматмандӣ намуда, таъкид карданд, ки “ин лоиҳа барои Бонки ҷаҳонӣ як лоиҳаи махсус ба ҳисоб рафта, аз ҷумлаи лоиҳаҳои хеле муваффақ мебошад. Бонки ҷаҳонӣ минбаъд низ лоиҳаҳоеро, ки ба ислоҳоти соҳаи андоз нагаронида шудаанд, дастгирӣ хоҳад кард”.

Дар рафти чорабинӣ кормандони мақомоти андоз Собирҷон Вазиров, Амриддин Сатторзода ва Собирҷон Исоев дар боби самтҳои стратегӣ ва сиёсати андоз, соҳибкории иҷтимоӣ ва андозбандию танзими тиҷорати электронӣ маълумот доданд. Аз ҷумла, Собирҷон Вазиров дар бораи ребрединг ва тағйир ёфтани рамзи мақомоти адоз сухан ронд. Собирҷон Исоев бошад, зимни баромади хеш дар боби рушди тиҷорати электронӣ дар кишвар маълумот дод ва таъкид намуд, ки андозбандии субектҳое, ки бо тиҷорати электронӣ машғул мебошанд, дар асоси Қонуни Ҷумҳурии Тоҷикистон “Дар бораи савдои электронӣ” аз 24.12.2022 таҳти рақами №1921 сурат мегирад ва имрӯз дар ҷумҳурӣ зиёда аз 4500 нафар бо тиҷорати электронӣ машғул буда, маблағи андоз аз тиҷорати электронӣ 222,9 миллион сомониро ташкил медиҳад.

Дар рафти чорабинӣ ҳамчунин ба масъалаҳои дигари муҳим, аз қабили пешниҳоди имтиёзҳои муайян барои андозсупорандагон, аз пардохти андоз аз арзиши иловашуда озод гаштани соҳибкорон ва ширкатҳое, ки панелҳои офтобӣ ва қисмҳои онро ба ҷумҳурӣ ворид менамояд, рушди иқтисодиёти сабз, мошинҳои барқӣ, ҳифзи муҳити зист ва ғайра сухан рафта, байни иштирокчиёни ҷаласа ва масъулини мақомоти андоз саволу ҷавоб сурат гирифт.

Таъкид карда шуд, ки татбиқи лоиҳаи «Амалиёт оид ба ислоҳоти андоз” ва дурнамои рушди рақамикунонии соҳаи андоз дар Тоҷикистон ба рушди иҷтимоию иқтисодии Ҷумҳурии Тоҷикистон таъсири мусбат расонида, ба баланд бардоштани самаранокӣ ва шаффофияти маъмурикунонии андоз, таҳкими эътимоди соҳибкорон, беҳтар гаштани муҳити соҳибкорӣ ва фароҳам овардани шароитҳои зарурӣ барои ҷалби сармоягузорӣ мусоидат менамояд.

Президенти Ҷумҳурии Тоҷикистон муҳтарам Эмомалӣ Раҳмон дар Паёми навбатии худ супориш доданд, ки дар муҳлати кӯтоҳтарин «Барномаи нави рушди маъмурикунонии андоз барои солҳои 2026-2030» қабул ва татбиқ карда шавад. Кумитаи андоз бо мақсади иҷрои супориши мазкур ба омодасозии лоиҳаи барномаи нав шуруъ намудааст, ки ҳадафҳои навбатии он трансформатсияи рақамӣ, коҳиш додани иқтисодиёти пинҳонӣ ва баланд бардоштани шаффофияти андоз мебошад.

    Санаи 20 ноябри соли 2025 дар маҷлисгоҳи дастгоҳи марказии Кумитаи андоз вохўрии навбатии намояндагони Агентии назорати давлатии молиявӣ ва мубориза бо коррупсияи Ҷумҳурии Тоҷикистон бо кормандони мақомоти андоз баргузор гардид.

    Дар вохўрӣ, ки бо иштироки муовини Раиси Кумитаи андоз Бахтиёр Султон, сардори Раёсати муқовимат бо коррупсияи Агентии назорати давлатии молиявӣ ва мубориза бо коррупсияи ҷумҳурии Тоҷикистон Акмалзода Нодир Носир ва доираи васеи кормандони мақомоти андоз баргузор гардид, масъалаҳои мубрами муқовимат ба коррупсия, татбиқи дурусти қонунгузории ҷорӣ дар самти муқовимат бо коррупсия, роҳҳои пешгирӣ ва бартараф намудани сабабу шароитҳои ба омилҳои коррупсионӣ мусоидаткунанда баррасӣ гардид.

    Муовини Раиси Кумитаи андоз Бахтиёр Султон қайд намуданд, ки мақомоти андоз бо мақсади пешгирии содиршавии ҳамагуна зуҳуроти номатлуби коррупсионӣ, мустаҳкам намудани боварии шаҳрвандон ва андозсупорандагон ба фаъолияти шаффофи мақомоти андоз пайваста чораҳои зарурӣ ва пешгирикунандаро роҳандозӣ намуда, дар ин замина бо фармоишҳои дахлдори Раиси Кумитаи андоз як қатор фармоишҳо ва мактубҳои дастуриву тавзеҳотӣ қабул ва тасдиқ карда шудаанд, ки ҷиҳати пурзўр намудани муқовимат бо коррупсия, пешгирии ҳолатҳои бархурди манфиатҳо ва дигар омилҳо, ки раванди кор ва иҷрои вазифаҳои қонунии кормандони мақомотро халалдор месозанд, мусоидат менамоянд.

    Қайд карда шуд, ки дар ин радиф, гузаронидани чунин вохўриҳо ба паст намудани шиддати коррупсия ва пешгирии ин зуҳуроти номатлуб нақши муҳим мебозад.

    Дар идомаи вохўрӣ сардори Раёсати муқовимат бо коррупсияи Агентӣ Акмалзода Н.Н. баромад намуда қайд намуданд, ки муқовимат ба коррупсия на танҳо вазифаи кормандони мақомоти Агентӣ, балки вазифаи ҳамаи мақомоти давлатӣ, хизматчиёни давлатӣ ва дар маҷмўъ ҷомеаи шаҳрвандӣ маҳсуб меёбад.

    Дар баробари ин, дар вохўрӣ вобаста ба татбиқи қонунгузории ҷумҳурии Тоҷикистон дар самти муқовимат ба коррупсия аз ҷумла, қонуни Ҷумҳурии Тоҷикистон “Дар бораи муқовимат ба коррупсия”, фармони Президенти Ҷумҳурии Тоҷикистон аз 3 августи соли 2021, №222 «Дар бораи Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030» ва қарори Ҷукумати ҷумҳурии Тоҷикистон аз 28 октябри соли 2016, №465 «Дар бораи Методологияи тартиб ва методикаи гузаронидани таҳлили фаъолият (хавфҳои коррупсионӣ)» ба иштирокчиёни вохўрӣ тавсияҳои судманд ироа гардид.

    Зикр гардид, ки солҳои охир дар кишвари мо дар самти мубориза бо коррупсия дигаргуниҳои мусбӣ ба амал омада, таҳти роҳбарии хирадмандонаи Пешвои муаззами миллат баҳри расидан ба ҳадафҳои зиддикоррупсионӣ, таъмини муқовимати дастаҷамъона ба коррупсия ва баланд бардоштани фарҳанги зиддикоррупсионӣ ва маърифати ҳуқуқии аҳолӣ чораҳои дахлдор роҳандозӣ шуда истодааст.

    Дар ин ҷода бояд тазаккур дод, ки кормандони мақомоти андоз дар баробари вазифаҳои муҳими бар дўш доштаашон, ҳамзамон дар баланд бардоштани маърифати зиддикоррупсиони аҳолӣ саҳми бевосита ва назаррас гузошта, дар ин самт нақши ҳар як корманди соҳа ҷиҳати муқовимат ба коррупсия зимни амалигардонии уҳдадориҳои хизматӣ дар самти иҷрои қонунгузории андоз беандоза муҳим мебошад.

    Дар фароварди вохўрӣ, муовини Раиси Кумитаи андоз зикр намуданд, ки мақомоти андоз - ҳамчун субъекти дар муқовимат ба коррупсия иштирокунанда ҷиҳати пурзур намудани фаъолияти худ дар самти мубориза бар зидди коррупсия, маҳдуд намудани омилҳои коррупсионӣ дар байни кормандон, татбиқи дурусти муқаррароти Стратегияи давлатии муқовимат ба коррупсия дар Ҷумҳурии Тоҷикистон ва пайваста гузаронидани таҳлили хавфҳои коррупсия дар фаъолияти мақомоти андоз тадбирҳои иловагӣ меандешад.

    Аз санаи 17 сентябр то 1 октябри соли 2025 бо дастгирии техникии Хазинаи Байналмилалии Асъор (минбаъд - ХБА) ва Бонки Умумиҷаҳонӣ дар Кумитаи андози назди Ҳукумати Ҷумҳурии Тоҷикистон баҳогузории низоми маъмурикунонии андоз тибқи Стандартҳои воситаи ташхис ва баҳогузории маъмурикунонии андоз (минбаъд – баҳогузории TADAT) баргузор гардид.

    Бояд қайд намуд, ки баҳогузории TADAT дар доираи татбиқи Барномаи миёнамуҳлати даромадҳои давлатии Ҷумҳурии Тоҷикистон барои солҳои 2024–2029, ки бо қарори Ҳукумати Ҷумҳурии Тоҷикистон аз 30.12.2023, №594 қабул шудааст, барои муайян намудани тарафҳои мусбӣ ва манфии маъмурикунонии андоз равона гардида, ҷиҳати беҳтар намудани маъмурикунонии андоз ва баланд бардоштани сатҳи шаффофияти фаъолияти мақомоти андоз мусоидат менамояд.

    Баҳогузории TADAT бо ҷалби коршиносони байналмилалӣ бо роҳбарии Стоян Марков-мушовири Департаменти фискалии Хазинаи Байналмилалии Асъор гузаронида шуд.

    Коршиносони ХБА бо Раиси Кумитаи андоз муҳтарам Давлатзода Нусратулло Муқим вохӯрӣ намуда, оид ба баҳогузории TADAT маълумоти мухтассар пешниҳод намуданд.

    Зимни баҳогузории TADAT, Нусратулло Муқим қайд намуд, ки фаъолияти мақомоти андози Ҷумҳурии Тоҷикистон соли 2019 тибқи стандартҳои TADAT баҳогузорӣ карда шуд ва он имконият дод, ки самтҳои ниёз ба ислоҳот дар фаъолияти мақомоти андоз муайян шуда, такмил дода шаванд. Изҳори умед карда шуд, ки фаъолияти мақомоти андоз аз рӯи стандартҳои TADAT барои соли 2025 низ воқеъбинона баҳогузорӣ карда мешаванд ва он имконият медиҳад, ки Кумитаи андоз камбудиҳои мавҷударо ислоҳ намуда, маъмурикунонии андозро боз беҳтару хубтар намояд.

    Рузҳои 17-25 сентябри соли ҷорӣ бо роҳбарии Муовини якуми Раиси Кумитаи андоз муҳтарам Солеҳзода Аюбҷон Маруф сардорони раёсатҳои дастгоҳи марказии Кумитаи андоз, Раёсати андози андозсупорандагони калон, Раёсати андози шаҳри Душанбе вобаста ба 9 самти асосии баҳогузории TADAT, аз ҷумла ягонагии махзани иттилоотии андозсупорандагон, идоракунии хавфҳои андозӣ, мусоидат намудан ба иҷрои ихтиёрии қонунгузории андоз, саривақт пешниҳод намудани эъломияҳо ва пардохти андозҳо, дурустии маълумотҳо дар эъломияҳои андозӣ, ҳалли баҳсҳои андозӣ, идоракунии даромадҳо, ҳисоботдиҳӣ ва шаффофият ба коршиносони байналмилалӣ маълумоти муфассал ва ҳуҷҷатҳои тасдиқкунанда пешниҳод намуданд.

    Ҳамчунин, коршиносони ХБА бевосита ба Раёсати андози андозсупорандагони калон, Раёсати андози шаҳри Душанбе, нозиротҳои андози ноҳияҳои И.Сомонӣ ва Шоҳмансур, Маркази тамоси Кумитаи андоз ташриф оварда, бо сохтор, самтҳои фаъолият, равандҳои хизматрасонӣ ба андозсупорандагон, тартиби гузаронидани корҳои назоратӣ ва бо модулҳои Системаи иттилоотии идоракунии андозҳои мақомоти андоз аз наздик шинос шуданд.

    Бояд тазаккур дод, ки зимни баҳогузории TADAT коршиносони ХБА бо роҳбарияти Вазорати молияи Ҷумҳурии Тоҷикистон ва Агентии назорати давлатии молиявӣ ва мубориза бо коррупсияи Ҷумҳурии Тоҷикистон низ вобаста ба фаъолияти мақомоти андоз вохӯрӣ намуданд.

    Дар назар аст, ки натиҷаҳои баҳогузории TADAT дар таҳияи лоиҳаи Барномаи рушди маъмурикунонии андоз дар Ҷумҳурии Тоҷикистон барои солҳои 2026-2030 истифода бурда мешавад ва ба баланд бардоштани сатҳи шаффофият, самаранокӣ ва эътимод ба низоми андози Ҷумҳурии Тоҷикистон мусоидат менамояд.

    Санаи 02.09.2025 дар Кумитаи андоз бо иштироки Муовини Раиси Кумитаи андоз Бахтиёр Султон, намояндагони Агентии назорати давлатии молиявӣ ва мубориза бо коррупсияи Ҷумҳурии Тоҷикистон муовини сардори Раёсати муқовимат ба коррупсия Рабизода Диловар ва сарнозири ҳамин Раёсат Ҳамдамзода Садриддин ва дигар кормандони мақомоти андоз ҷаласаи васеъ баргузор гардида, дар он пешниҳодҳои Агентӣ, ки ба Кумитаи андоз ворид гардидаанд, мавриди баррасӣ қарор дода шуд.

    Муовини Раиси Кумитаи андоз Бахтиёр Султон қайд намуданд, ки дар Кумитаи андоз ҷиҳати пешгирии коррупсия ба таври мунтазам корҳои муайян анҷом дода мешавад. Аз ҷумла ҳамасола фармоишҳои дахлдори Кумитаи андоз “Нақшаи дохилиидоравии Кумитаи андози назди ҳукумати Ҷумҳурии Тоҷикистон барои соли дахлдор, ҷиҳати таъмини иҷрои Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030 ва нақшаи чорабиниҳои амалисозии он барои марҳилаи якум ( солҳои 2021 – 2025 )” қабул карда мешавад.

    Инчунин, тибқи муқаррароти моддаи 162 Кодекси андоз яке аз вазифаҳои асосии мақомоти андоз муайян намудани расмиёт ва усулҳои гузаронидани таҳлили хавфҳои коррупсия дар мақомоти андоз ва амалӣ намудани онҳо мебошад.

    Намояндагони Агентӣ баромад намуда қайд намуданд, ки муқовимат бар зидди ҳама гуна амалҳои коррупсионӣ на танҳо вазифаи кормандони мақомоти давлатӣ, балки вазифаи ҳар як шаҳрванд мебошад"

    Дар баробари ин, дар Ҷаласа оид ба қонунгузории Ҷумҳурии Тоҷикистон, ки самти муқовимат ба коррупсияро танзим менамоянд, кодексҳои Ҷиноятӣ ва ҳуқуқвайронкунии маъмурӣ, инчунин қонуни Ҷумҳурии Тоҷикистон “Дар бораи муқовимат ба коррупсия”, Фармони Президенти Ҷумҳурии Тоҷикистон аз 3 августи соли 2021, №222 «Дар бораи Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030» ва қарори ҳукумати Ҷумҳурии Тоҷикистон аз 28 октябри соли 2016, №465 «Дар бораи Методологияи тартиб ва методикаи гузаронидани таҳлили фаъолият (хавфҳои коррупсионӣ)» ба иштирокчиёни ҷаласа маълумоти мухтасар пешниҳод гардида бори дигар дар сатҳи баланд ва зарурӣ иҷроиши онҳо таъкид карда шуд."

    Дар охир, Муовини Раиси Кумитаи андоз ба намояндагони Агентӣ ҷиҳати иштирок дар ҷаласа ва дар маҷмуъ оиди ҳамкорӣ дар самти муқовимат ва пешгирии коррупсия дар мақомоти андоз изҳори сипос намуда, изҳор намуданд, ки Кумитаи андоз Ҷиҳати иҷрои бандҳои дахлдори нақшаи чорабиниҳои амалисозии Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030 барои марҳилаи якум (солҳои 2021–2025) , иҷрои қарори ҳукумати Ҷумҳурии Тоҷикистон аз 28.10.2016, №465 “Дар бораи Методологияи тартиб ва методикаи гузаронидани таҳлили фаъолият (хавфҳои коррупсионӣ)” ва фармоиши Кумитаи андоз аз 09.04.2025, №220 “Дар бораи тасдиқ намудани “Нақшаи мукаммал барои солҳои 2025-2026, ҷиҳати пешгирӣ, бартараф ва коҳиш додани хавфҳои коррупсионӣ” минбаъд низ чораҷўӣ менамояд.

    Дар Китобхонаи миллии Тоҷикистон «Оид ба натиҷаҳои татбиқи Созишнома байни Вазорати молияи Ҷумҳурии Тоҷикистон ва Вазорати молияи Федератсияи Россия дар бораи аз ҷониби Федератсияи Россия расонидани кумаки беподоши техникӣ ба Ҷумҳурии Тоҷикистон бо мақсади рушд ва такмили низоми маъмурикунонии андоз» Конфронс баргузор гардид.

    Созишномаи мазкур санаи 3 марти соли 2023 бо дастгирии Ҳукумати Ҷумҳурии Тоҷикистон ва Ҳукумати Федератсияи Россия ба имзо расонида шуд.

    Дар Конфронс беш аз 200 нафар андозсупорандагон ва намояндагони вазорату идораҳои дахлдори Ҷумҳурии Тоҷикистон, Хадамоти федералии андоз ва Ҷамъияти саҳомии “Маркази асосии татбиқи инноватсияҳои илмӣ” (АО “ГНИВЦ”) Федератсияи Россия иштирок намуданд.

    Ҳайати Хадамоти федералии андози Федератсияи Россияро Егоров Даниил Вячеславович – Сардори Хадамоти федералии андоз роҳбарӣ намуд.

    Конфронсро Раиси Кумитаи андози назди Ҳукумати Ҷумҳурии Тоҷикистон – Давлатзода Нусратулло Муқим ифтитоҳ намуд.

    Қайд карда шуд, ки дар доираи Созишнома аз ҷониби Кумитаи андози назди Ҳукумати Ҷумҳурии Тоҷикистон, Хадамоти федералии андози Федератсияи Россия ва гурӯҳи татбиқи лоиҳа як қатор чорабиниҳо амалӣ карда шудаанд. Аз ҷумла:

    1. Реинжиниринги бизнес-равандҳои маъмурикунонии андоз гузаронида шуд;

    2. Модернизатсияи компонентҳои системаи мавҷудаи иттилоотӣ, созмон додани платформаи таҳлилӣ ва воситаҳои таҳлилӣ ҷиҳати коркарди маълумоти ҳисобнома-фактураҳо бо мақсади такмил додани маъмурикунонии ААИ анҷом дода шуд;

    3. Консепсияи такмили андозбандии амволи манқул ва ғайриманқул дар Ҷумҳурии Тоҷикистон таҳия гардид;

    4. Тавсияҳо оид ба такмили заминаи меъёрии ҳуқуқии маъмурикунонии андоз омода карда шуд;

    5. Модернизатсияи компонентҳои системаи мавҷудаи иттилоотии ҳуҷраи шахсии андозсупоранда (шахси воқеӣ) ба шакли замимаи мобилӣ;

    6. Консепсияи ташкили кор бо андозсупорандагон ва консепсияи услуби корпоративӣ дар мақомоти андози Ҷумҳурии Тоҷикистон таҳия гардид.

    Ҳамчунин, бо мақсади ворид намудани тағйиру иловаҳо ба қонунгузории андоз ва такмил додани заминаи меъёрии ҳуқуқӣ дар самти ҳисобкунӣ ва ситонидани андоз аз арзиши иловашуда дар Ҷумҳурии Тоҷикистон, рушд ва такмили маъмурикунонии андоз, таҳлили раванди маъмурикунонӣ ва назорати ААИ, андозбандии даромадҳои шахсони воқеӣ, бахши молиявии иқтисодиёт, ширкатҳои хориҷие, ки хизматрасониҳои электрониро ба шахсони воқеии Ҷумҳурии Тоҷикистон пешниҳод менамоянд, таклифу тавсияҳо таҳия карда шуданд.

    Илова бар ин, Системаи автоматикунонидашудаи назорати андоз аз арзиши иловашуда ва замимаи мобилии “Ҳуҷраи шахсӣ” барои шахсони воқеии Ҷумҳурии Тоҷикистон (минбаъд – замимаи мобилӣ) таҳия ва роҳандозӣ гардид.

    Намояндагони Хадамоти федералии андози Россия тартиби истифодабарии Системаи автоматикунонидашудаи назорати андоз аз арзиши иловашуда ва замимаи мобилиро дар шакли рӯнамо ба иштирокчиён пешниҳод карда, қайд намуданд, ки Воситаи таҳлилии таҳияшуда ба таври худкор маълумотро аз ҳисобнома-фактураҳои электронӣ ва эъломияи андоз аз арзиши иловашуда тафтиш карда, маълумотҳои андозсупоранда ва ҳам контрагентҳои онро муқоиса мекунад. Система имконият медиҳад, ки сатрҳои робитаҳои иттилоотии бо ҳам алоқамандро ташаккул дода, тавассути тасвири визуалии муносибатҳои моливу-молиявии андозсупорандагонро ҷиҳати муайян кардани хавфҳои эҳтимолии иҷро нагардидани қонунгузории андоз ва саркашӣ аз пардохти одилонаи андоз аз арзиши иловашуда ба буҷет мусоидат менамояд.

    Ҳамзамон, дар доираи Конфронс байни кормандони Кумитаи андоз, намояндагони Хадамоти федералии андози Россия, андозсупорандагон ва намояндагони вазорату идораҳои дахлдор мубодилаи афкор сурат гирифт.

    Дар охир қайд гардид, ки бо дастгирии Ҳукумати Ҷумҳурии Тоҷикистон ва ҳамкорӣ бо вазорату идораҳо, андозсупорандагон ва шарикони рушд, ба монанди Хадамоти федералии андози Россия сиёсати андоз ва маъмурикунонии андоз дар Ҷумҳурии Тоҷикистон давра ба давра беҳтар гардида, барои пешниҳод намудани хизматрасонии босифат ба андозсупорандагон, самаранок татбиқ намудани назорати андоз ва васеъ намудани манбаи андоз дар Ҷумҳурии Тоҷикистон мусоидат хоҳад кард.

     Кумитаи андози назди Ҳукумати Ҷумҳурии Тоҷикистон ба маълумоти кормандони мақомот мерасонад, ки тибқи муқаррароти Низомномаи тартиб ва шартҳои гузаронидани аттестатсияи хизматчиёни давлатии маъмурӣ, ки бо фармони Президенти Ҷумҳурии Тоҷикистон аз 30 майи соли 2008, №468 тасдиқ гардидааст, хизматчиёни давлатии мақомоти андоз дар муҳлатҳои муқарраршуда ба аттестатсия фаро гирифта мешаванд.

     Бо ин мақсад дар асоси фармоиши дахлдори Раиси Кумитаи андоз гузаронидани аттестатсияи навбатии хизматчиёни давлатии мақомоти андози Ҷумҳурии Тоҷикистон дар моҳҳои июн – августи соли 2025 ба нақша гирифта шудааст.

     Дар рафти аттестатсия ба сатҳи дониши ҳар як хизматчии давлатии мақомоти андоз оид ба донистани муқаррароти Конститутсияи Ҷумҳурии Тоҷикистон, Кодекси андози Ҷумҳурии Тоҷикистон, Қонуни Ҷумҳурии Тоҷикистон «Дар бораи хизмати давлатӣ», кодексҳои одоби хизматчии давлатӣ, одоби касбии корманди мақомоти андоз, дигар санадҳои меъёрии ҳуқуқии соҳаи андоз, масъалаҳои сиёсӣ, донистани забонҳои давлативу хориҷӣ ва маҳорати кор бо барномаҳои компютерӣ баҳогузорӣ карда шуда, аз натиҷаи он мувофиқати кормандон ба мансабҳои ишғолнамуда муайян карда мешавад.