Рӯзҳои 2-4 октябри соли 2024 ҷаласаи навбатии XXXI-и Шӯрои ҳамоҳангсози роҳбарони мақомоти андози давлатҳои иштирокдори Иттиҳоди Давлатҳои Мустақил (ШҲРМА ИДМ) таҳти раёсати Хадамоти давлатии андози назди Вазорати молияи Ҷумҳурии Қирғизистон дар шаҳри Бишкеки Ҷумҳурии Қирғизистон баргузор гардид.

         Дар ҷаласаи XXXI-и ШҲРМА ИДМ ҳайатҳои мақомотҳои андози кишварҳои иштирокдори ИДМ, аз ҷумла Арманистон, Озарбойҷон, Беларус, Қазоқистон, Қирғизистон, Тоҷикистон, Федератсияи Россия,Ӯзбекистон, инчунин намояндаҳои Кумитаи иҷроияи ИДМ ва Донишгоҳи молияи назди Ҳукумати Федератсияи Россия иштирок намуданд.

         Дар ҷаласа аз ҷониби Кумитаи андози назди Ҳукумати Ҷумҳурии Тоҷикистон Муовини якуми Раиси Кумитаи андоз - Солеҳзода А.М. (роҳбари ҳайат), сардори Раёсати маъмурикунонии андози Сарраёсати маъмурикунонии андоз – Рабизода Ҷаҳонгир ва сардори Раёсати ҳамкории байналмилалӣ – Аҳмадзода Манижа Азим иштирок намуданд.

     Бояд қайд намуд, ки дар рафти ҷаласа як қатор масъалаҳои барои ҳамкориҳо ва фаъолияти мақомоти андоз муҳим, аз ҷумла таҳлили нишондиҳандаҳои асосии низоми андози кишварҳои иштирокдори ИДМ, ҳолати иҷрои нақшаи кории ШҲРМА ИДМ барои солҳои 2023-2024 ва дигар масъалаҳои таҳкими ҳамкориҳо баррасӣ ва аз натиҷаи он қарорҳои дахлдор қабул карда шуд.

     Ҳамчунин, коршиносон ва Роҳбарони ҳайатҳо тибқи рӯзномаи ҷаласаҳо мавзӯъҳо оид ба қонунгузории амалкунандаи андози давлатҳои иштирокдори ИДМ ва тағйироту иловаҳои ба онҳо воридгардида, ки аз 1 январи соли 2024 мавриди амал қарор гирифтанд, оид ба нишондиҳандаҳои кории низомҳои андози кишварҳои иштирокдори ИДМ барои соли 2024, оид ба андозбандии субъектҳои соҳибкории хурд дар кишварҳои иштирокдори ИДМ барои соли 2024, оид ба мубодилаи иттилоот дар шакли электронӣ байни кишварҳои иштирокдори ИДМ вобаста ба амалӣ намудани маъмурикунонии андозро мавриди баррасӣ қарор доданд.

     Дар ҷаласа Солеҳзода А.М. доир ба рушди марҳилаҳои маъмурикунонии андоз дар Ҷумҳурии Тоҷикистон, беҳтарнамоии фазои рақамӣ ҷиҳати рушди соҳибкорӣ бо мақсади зиёд намудани амалиётҳои ғайринақдӣ ва намудҳои хизматрасониҳои электронӣ, ҷамъоварии автоматии маълумот ва таҳлили онҳо, гардиши ҳуҷҷатгузории электронӣ байни субъектҳои хоҷагидор тавассути истифодаи технологияи иттилоотӣ, пайгирии муомилот, алоқаҳои тиҷоратии андозсупорандагон, баланд бардоштани сатҳу сифати хизматрасонӣ ба андозсупорандагон, истифодаи босамари утоқи шахсӣ, омори даромадҳои андозӣ, Барномаи рушди маъмурикунонии андоз ва нақшаву ҳадафҳои ояндаи Кумитаи андоз суханронӣ намуд.

     Дар анҷоми ҷаласа Нақшаи кории ШҲРМА ИДМ барои соли 2025 ва рӯзномаи ҷаласаи навбатӣ дар мавзуъҳои “Системаи назорати гардиши мол ҳамчун воситаи таъмини тиҷорати шаффоф ва мубориза бо иқтисодиёти пинҳонӣ” ва “Нозири андоз: имрӯз ва фардо” тасдиқ карда шуд.

     Раискунандаи ШҲРМА ИДМ Роҳбари Хадамоти федералии андози Россия Егоров Даниил Вячеславович интихоб гардид.

     Баргузории ҷаласаи навбатии ХХХII-юми ШҲРМА ИДМ дар нимаи дуюми соли 2025 дар Федератсияи Россия ба нақша гирифта шуд.

Раёсати ҳамкории байналмилалии
Кумитаи андози назди
Ҳукумати Ҷумҳурии Тоҷикистон

    Рӯзҳои 24-26 сентябри соли 2024 Форуми 5-уми ҳамкории мудирияти андоз дар доираи ташаббуси «Як камарбанд - як роҳ» (минбаъд - Форум) дар шаҳри Ҳонгконги Ҷумҳурии Мардумии Чин баргузор гардид.

    Форум аз ҷониби Котиботи Механизми ҳамкории мудирияти андоз дар доираи ташаббуси “Як камарбанд – як роҳ” (минбаъд - Котибот) ва Сарраёсати даромадҳои дохилии Ҳонгконги Ҷумҳурии Мардумии Чин дар мавзӯи “Амиқтар ва беҳтар намудани ҳамкориҳо дар доираи ташаббуси “Як камарбанд - як роҳ ” ташкил карда шуд.

    Дар Форум беш аз 500 нафар намояндагони мақомоти андози зиёда аз 50 давлатҳои гуногуни ҷаҳон, коршиносони байналмилалӣ, созмонҳои молиявӣ, муассисаҳои илмӣ ва ширкатҳои кишварҳои гуногун иштирок намуда, масъалаҳои андозбандӣ ва табодули таҷриба дар соҳаи идоракунии андозро мавриди баррасӣ қарор доданд.

    Дар назар аст, ки натиҷаи муҳокимаи масъалаҳое, ки дар Форум сурат гирифт, ба рушди устувори низоми андозӣ, тақвияти принсипҳои андозбандӣ дар доираи ташаббуси “Як камарбанд - як роҳ” ва ҳамкорӣ баҳри рушди маъмурикунонии андоз дар кишварҳои узви ҳавзаи ташаббуси “Як камарбанд – як роҳ” мусоидат менамояд.

Аз ҷониби иштирокчиёни Форум ба муҳокимаи панҷ мавзӯи асоси зерин таваҷҷуҳи бештар зоҳир карда шуд:

-баланд бардоштани сатҳи эътимоднокии андоз;

-мусоидат намудан ба рақамикунонии маъмурикунонии андоз;

-беҳтарнамоии муҳити андоз;

-тақвият додани неруи мақомоти андоз;

-беҳтар намудани маъмурикунонии андоз.

Дар кори Форум аз ҷониби Кумитаи андози назди Ҳукумати Ҷумҳурии Тоҷикистон Раиси Кумитаи андоз Давлатзода Нусратулло Муқим ва кормандони масъули Кумита иштирок намуданд.

    Давлатзода Н.М. ба таваҷҷуҳи иштирокчиёни Форум дар мавзӯи “Беҳтар намудани фазои андозбандӣ дар Ҷумҳурии Тоҷикистон” суханронӣ намуда, доир ба асосҳои ҳуқуқии хизматрасонӣ ба андозсупорандагон, шаклҳои хизматрасониҳои электронӣ ба андозсупорандагон ва шумораи чунин хизматрасониҳо маълумоти муфассал пешниҳод намуд.

    Зимнан, қайд карда шуд, ки Кумитаи андоз бо дастгирии Ҳукумати Ҷумҳурии Тоҷикистон ва созмонҳои байналмилалии молиявӣ Барномаи рушди маъмурикунонии андозро барои солҳои 2020-2025 татбиқ намуда истодааст.

    Ҳамчунин, Давлатзода Н.М. дар муҳокимаи панелӣ иштирок намуда, ба саволҳои иштирокчиён оид ба рақамикунонии соҳаи андоз, фазои андозбандӣ ва рафти ислоҳоти андозии Ҷумҳурии Тоҷикистон посухҳои муфассал пешниҳод намуд.

    Ҳамзамон, дар ҳошияи Форум Раиси Кумитаи андоз бо як қатор намояндагони мақомоти давлатии кишварҳои узви ҳавзаи ташаббуси “Як камарбанд – як роҳ”, аз ҷумла бо Вазири хизматрасонии молиявӣ ва хазинадории Ҳонконги Ҷумҳурии Мардумии Чин Кристофер Хуэй мулоқоти корӣ анҷом дод.

    Дар анҷоми Форум иштирокчиён Баёнияи муштараки Форуми 5-уми ҳамкории мудирияти андоз дар доираи ташаббуси «Як камарбанд - як роҳ»-ро қабул намуда, Нақшаи амали Ҳонгконг барои солҳои 2025–2027-ро тасдиқ намуданд.

    Бояд қайд намуд, ки ҳадафи асосии Механизми хамкории мудирияти андоз дар доираи ташаббуси «Як камарбанд - як роҳ» ин саҳм гузоштан дар ташаккули муҳити андозбандии мусоид бо мақсади рушди соҳибкорӣ тавассути ҳамкорӣ ва табодули таҷрибаи пешқадам дар самти риояи волоияти қонун, баланд бардоштани эътимоднокии андоз, тезонидани ҳалли баҳсҳои андозӣ, беҳтар намудани сифтаи хизматрасонӣ ба андозсупорандагон ва баланд бардоштани иқтидори мақомоти андоз дар давлатҳои шарики ташаббуси «Як камарбанд - як роҳ» ба ҳисоб меравад.

Раёсати ҳамкории байналмилалии
Кумитаи андози назди
Ҳукумати Ҷумҳурии Тоҷикистон

    Санаи 25 июли соли 2024 дар меҳмонхонаи “Hyatt Regency”-и шаҳри Душанбе ҷаласаи навбатии Кумитаи ҳамоҳангсозии Амалиёт оид ба ислоҳоти андоз дар мавзӯи “Дастовардҳои Лоиҳаи “Амалиёт оид ба ислоҳоти андоз дар нимсолаи якуми соли 2024” баргузор гардид.

    Дар ҷаласа аъзои ҳайати Кумитаи ҳамоҳангсозӣ, намояндагони вазорату идораҳои дахлдор ва ташкилотҳои байналмилалии молиявӣ иштирок намуданд.

    Солеҳзода Аюбҷон Маъруф, муовини якуми Раиси Кумитаи андози назди Ҳукумати Ҷумҳурии Тоҷикистон ҷаласаро ифтитоҳ намуда, ёдовар намуд, ки давраи татбиқи лоиҳаи “Амалиёт оид ба ислоҳоти андоз” солҳои 2021–2026-ро дар бар мегирад ва ҷиҳати ноил шудан ба ҳадафҳои мушаххас равона шудааст, аз ҷумла беҳтар намудани сифат ва содагардонии низоми андоз, баланд бардоштани сифати хизматрасониҳо ба андозсупорандагон ва беҳтар намудани риояи ихтиёрии қонунгузории андоз аз ҷониби андозсупорандагон.

    Дар ҷаласа қайд гардид, ки дар нимсолаи якуми соли 2024 дар доираи вазифаҳо ва самтҳои асосии дар Лоиҳаи Амалиёт пешбинишуда, бо мақсади беҳтар намудани самаранокии фаъолияти мақомоти андоз, маъмурикунонии андоз, боз ҳам зиёд намудани номгуи хизматрасониҳои давлатӣ дар шакли электронӣ, кам кардани истифодаи ҳуҷҷатгузории қоғазӣ ва такмилу роҳандозӣ намудани барномаҳои компютерӣ як қатор корҳо ба анҷом расонида шуданд ва татбиқи марҳилаҳои баъдӣ идома доранд.

    Зикр шуд, ки бо дарназардошти рушди технологияҳои муосири иттилоотӣ дар давраи амалишавии Лоиҳа номгуи хизматрасониҳои электронӣ васеъ карда шуда, номгӯи онҳо дар сомонаи Кумитаи андоз дастрас буда, тавассути ҳуҷраи шахсии андозсупоранда шахсони ҳуқуқи, соҳибкорони инфиродӣ ва шахсони воқеӣ имкон доранд аз хизматрасониҳои электронӣ оид ба ҳисоботдиҳӣ, ҳисобкунони андозҳо, аз он ҷумла андози нақлиёт, амволи ғайриманқул, ва дигар андозҳо, супоридани ҳисоботи электронӣ, пардохти андозҳо тавассути воситаҳои электронӣ ба роҳ мондани иртиботи андозсупоранда бо мақомоти андоз ҳуҷҷатгузории электронӣ ва ғайраҳо истифода намоянд.

    Солеҳзода Аюбҷон Маруф қайд намуд, ки ҷиҳати рақамикунонии мақомот ва ташкили ҳамкориҳо, бо як қатор вазорату идораҳо аз ҷумла вазоратҳои молия, меҳнат, муҳоҷират ва шуғли аҳолӣ, нақлиёт, рушди иқтисод ва савдо, Хадамоти гумрук, Бонки миллӣ, КВД “Бонки давлатии амонатгузории Тоҷикистон - «Амонатбонк»”, кумитаҳои давлатии идораи замин ва геодезӣ, сармоягузорӣ ва идораи амволи давлатӣ, агентиҳои омор, хариди давлатии мол, кор ва хизматрасонӣ, Раёсати бозрасии давлатии автомобилӣ ва дигар мақомотҳои дахлдор созишномаҳо оид ба табодули иттилоот дар шакли электронӣ ба имзо расонида шуда, бо назардошти ташкили махзанҳои маълумот, имкониятҳои техникии вазорату идораҳо, доду гирифти иттилоот дар шакли электронӣ ба роҳ монда шуда, чораҷӯиҳо дар ин самт идома доранд.

    Зимни ҷаласа, намояндагони Бонки Ҷаҳонӣ, вазорату идораҳои дахлдор, инчунин, бонкҳову ташкилотҳои қарзӣ ва институтҳои байналмилалии молиявӣ дар мавриди натиҷаҳои татбиқи Лоиҳаи Амалиёт оид ба ислоҳоти андозро дар нимсолаи аввали соли ҷорӣ ибрози назар карда, корҳои анҷомдодашударо қаноатбахш арзёбӣ намуданд.

    Дар анҷоми ҷаласа таъкид гардид, ки аз ҷониби Кумитаи андоз ҷиҳати татбиқи амалии муқаррароти “Барномаи рушди маъмурикунонии андоз барои солҳои 2020-2025”, аз ҷумла боз ҳам беҳтар намудани маъмурикунонии андоз ва сатҳи хизматрасониҳо ба андозсупорандагону шаҳрвандон, бештар намудани корҳои тавзеҳотию фаҳмондадиҳӣ, рақамикунонии мақомот чораҳои иловагӣ андешида мешавад.

Кумитаи андози назди
Ҳукумати Ҷумҳурии Тоҷикистон

    26 июни соли 2024 дар шаҳри Алмаатои Ҷумҳурии Қазоқистон чорабинӣ бахшида ба сармоягузорӣ, рақобатпазирӣ ва тиҷорат дар Осиёи Марказӣ баргузор гардид, ки дар он муовини раиси Кумитаи андози назди Ҳукумати Ҷумҳурии Тоҷикистон Султон Бахтиёр иштирок намуд.

    Дар чорабинӣ намояндагони сохторҳои давлатӣ ва ҷонибҳои манфиатдор аз бахши давлатӣ ва хусусии ҷумҳуриҳои Тоҷикистон, Қазоқистон, Қирғизистон, Ӯзбекистон ва Туркманистон, инчунин намояндагони Иттиҳоди Аврупо (ИА), Маркази Байналмилалии Тиҷорат (МБТ) ва Созмони ҳамкории иқтисодӣ ва рушд (СҲИР) иштирок варзиданд.

    Дар ҷаласа мавзӯҳои зерин мавриди муҳокима қарор дода шуданд:

    1. Беҳтар намудани фазои соҳибкорӣ ва тиҷорати фаромарзӣ дар Осиёи Марказӣ.

    2. Баланд бардоштани рақобатпазирии бахши хусусӣ тавассути рақамикунонӣ.

    3. Амалҳои минбаъда: рушди робитаҳои тиҷоратӣ ва нақлиётӣ дар Осиёи Марказӣ.

    Зимни ҷаласа маълумот оид ба рушди рақамикунонӣ дар тӯли панҷ соли охир пешниҳод карда шуд. Мушкилиҳои мавҷуда ва роҳҳои ҳалли онҳо муҳокима шуданд. Инчунин самтҳои такмили минбаъдаи савдои фаромарзӣ дар Осиёи Марказӣ муҳокима карда шуд.

    Дар баромади худ муовини Раиси Кумитаи андоз Султон Бахтиёр иштирокчиёни вохӯриро бо натиҷаҳои чорабиниҳое, ки ба беҳтар намудани рақамикунонии маъмурикунии андоз дар Ҷумҳурии Тоҷикистон нигаронида шудаанд, шинос намуд. Таъкид гардид, ки Системаи ҳамгироии иттилоотии андози Кумитаи андоз ба шахсони воқеию ҳуқуқӣ имкон медиҳад, ки дар давоми 24 соат фаъолияти соҳибкориро ба таври электронӣ ба қайд гирифта, минбаъд пешниҳоди эъломияҳои андоз, таҳияи ҳисобнома-фактураҳо, пардохти андозҳо, аз ҷумла пешниҳоди аризаи барҳамдиҳиро бидуни ҳозир шудан ба мақомоти андоз анҷом диҳанд.

    Ҳамзамон, дар ҷаласа ҳадафҳои лоиҳаи Ready4Trade баррасӣ шуданд, ки он ба рушди тиҷорати дохилӣ ва байналмилалӣ дар Осиёи Марказӣ тавассути баланд бардоштани шаффофияти талаботҳои фаромарзӣ ва тақвият додани тиҷорати электронии фаромарзӣ равона шудааст.

Раёсати ҳамкории байналмилалии
Кумитаи андози назди
Ҳукумати Ҷумҳурии Тоҷикистон

    Кумитаи андоз дар ҳамбастагӣ бо Котиботи Механизми ҳамкорӣ дар соҳаи маъмурикунонии андоз дар доираи ташаббуси «Як камарбанд, як роҳ» (минбаъд - BRITACOM) санаи 29 майи соли 2024 дар чорчубаи 7-мин Рӯзи мавзӯии мудирияти андоз оид ба “Алоқаи беҳтарин барои ояндаи беҳтарин” семинари маҷозӣ дар мавзӯи низоми андозбандии Ҷумҳурии Тоҷикистон, сиёсат ва маъмурикунонии андоз (минбаъд - Семинар) баргузор намуд.

    Дар Семинар зиёда аз 160 намояндагон аз мақомоти андози давлатҳои аъзои BRITACOM, давлатҳои нозирони BRITACOM, созмонҳои байналмилалӣ ва молиявӣ, инчунин бахши хусусӣ, аз ҷумла аз Ҷумҳурии Мардумии Чин, Сербия, Нигерия, Тайланд, Италия, Сенегал, Иёлоти муттаҳидаи Америка, Покистон, Алҷазоир, Макаои Хитой, Тимор Лесте, Амороти Муттаҳидаи Араб, Гурҷистон, Гамбия, Непал, Сингапур, Панама, Филиппин, Гвинея, Арманистон, Серра-Леоне ва Индонезия иштирок варзиданд.

    Аз ҷониби Кумитаи андози назди Ҳукумати Ҷумҳурии Тоҷикистон дар семинар муовини якуми Раиси Кумитаи андоз - Солеҳзода Аюбҷон Маруф, муовини Раиси Кумитаи андоз - Маликзода Нарзулло ва дигар кормандони Кумитаи андоз иштирок намуданд.

    Ҳадафи асосии BRITACOM ин ташаккули муҳити андозбандии мусоид бо мақсади рушди соҳибкорӣ тавассути ҳамкорӣ ва табодули таҷрибаи пешқадам дар самти риояи волоияти қонун, баланд бардоштани эътимоднокии андоз, тезонидани ҳалли баҳсҳои андозӣ, беҳтар намудани хизматрасонӣ ба андозсупорандагон ва баланд бардоштани иқтидори мақомоти андоз дар давлатҳои шарикони ташаббуси «Як камарбанд, як роҳ» ба ҳисоб меравад.

    Маърӯзачиён, иштирокчиёнро бо тадбирҳои андешидашуда оид ба мавзӯъҳои “Рақамикунонии мақомоти андоз дар Ҷумҳурии Тоҷикистон”, “Трансформатсияи рақамии маъмурикунонии андоз ва гумрук”, “Рушди низоми андозбандии Ҷумҳурии Тоҷикистон”, ва “Такмили низоми идоракунии хавфҳо дар Ҷумҳурии Тоҷикистон” шинос намуда, ба саволҳои иштирокчиён вобаста ба андози иҷтимоӣ барои ғайрирезидентҳо, андоз аз даромади шахсони ҳуқуқӣ, низоми идоракунии хавфҳои Ҷумҳурии Тоҷикистон, рақамикунонии фаъолияти Кумитаи андоз, тадбирҳои мусоидаткунанда барои ҷалби андозсупорандагон ҷиҳати истифодаи хизматрасониҳои электронии мақомоти андоз ва дигар саволҳо ҷавобҳои мушаххас пешниҳод намуданд.

    Ҳамзамон, ба иштирокчиён намоиши маҷозӣ оид ба фаъолияти Кумитаи андоз, ки дар сомонаи BRITACOM тавассути истиноди мазкур https://www.britacom.org/zt/ThemeDay/SeventhEvent/ дастрас мебошад, пешниҳод гардид, ки дар он дастоварду комёбиҳои мақомоти андози Ҷумҳурии Тоҷикистон дар соҳаи рақамисозии маъмурикунонии андоз ба намоиш гузошта шудааст.

    Дар охири Семинар иштирокчиён миннатдории худро ба Кумитаи андоз ва Котиботи BRITACOM барои пешниҳоди маълумотҳои муфид оид ба низоми андозбандии Ҷумҳурии Тоҷикистон ва умед ба ҳамкории минбаъда изҳор намуданд.

Раёсати ҳамкории байналмилалии
Кумитаи андози назди
Ҳукумати Ҷумҳурии Тоҷикистон

Мутобиқи моддаи 69 Конститутсияи Ҷумҳурии Тоҷикистон фармон медиҳам:

1.Соли 2024 "Соли маърифати ҳуқуқӣ" эълон карда шавад.

2.Ҳукумати Ҷумҳурии Тоҷикистон ҷиҳати иҷрои фармони мазкур дар муҳлати як моҳ нақшаи чорабиниҳоро таҳия ва барои тасдиқ пешниҳод намояд.

Президенти

Ҷумҳурии Тоҷикистон      Эмомалӣ Раҳмон

ш. Душанбе,

аз 30 декабри соли 2023, № 668

   Бо мақсади иҷрои банди 3 нақшаи чорабиниҳо бахшида ба «Соли маърифати ҳуқуқӣ» эълон намудани соли 2024, ки бо амри Президенти Ҷумҳурии Тоҷикистон 18 марти соли 2024, №АП-533 тасдиқ шудааст, бо фармоиши вазири адлияи Ҷумҳурии Тоҷикистон аз 19 апрели соли 2024, №50 рамзи «Соли маърифати ҳуқуқӣ – 2024» тасдиқ карда шуд.

   Рамзи мазкур намуди доирашакл дошта, гирдогирди рамзро хати доирашакли сабз фаро гирифтааст, ки нишонаи сарсабзию шукуфоӣ, сарбаландиву хуррамӣ ва абадият мебошад.

   Дар гирди қисми болои рамз бо забони тоҷикӣ «Соли маърифати ҳуқуқӣ», ки ифодагари моҳияти рамз мебошад, навишта шуда, дар қисми поёни он рамзи шараф – шохи баргдори дарахти лавр бо тасмаи серахаи печида, ки ифодакунандаи рангҳои Парчами давлатии Ҷумҳурии Тоҷикистон мебошад, ҷой гирифтааст.

  Дар маркази доира ҷузъиёти асосии рамз – китоби кушода, офтоби оламоро ва тоҷдасти шоҳӣ ҷой дода шудааст. Китоби кушода таҷассумкунандаи манбаи дониш, Конститутсия ва қонун, таълиму тарбия ва хирад, офтоби оламоро – рамзи нур, гармӣ, шифо, саховатмандӣ ва тоҷдасти шоҳӣ бо тасвири нимдавраи офтобӣ ва ҳафт ситора ҳамчун рамзи ваҳдати миллӣ, иқтидори давлат ва роҳнамою равшанидиҳанда мебошад. Дар қисми поёни маркази доира рақами «2024» нишон дода шудааст.

Инсон, ҳуқуқ ва озодиҳои ў арзиши олӣ мебошанд.

Ҳаёт, қадр, номус ва дигар ҳуқуқҳои фитрии инсон дахлнопазиранд.

Ҳуқуқу озодиҳои инсон ва шаҳрвандро давлат эътироф, риоя ва ҳифз менамояд (моддаи 5)

Ҳуқуқу озодиҳои инсон ва шаҳрванд ба воситаи Конститутсия, қонунҳои ҷумҳурӣ ва санадҳои ҳуқуқии байналмилалие, ки аз тарафи Тоҷикистон эътироф шудаанд, ҳифз мегарданд (моддаи 14)

Ҳама дар назди қонун ва суд баробаранд. Давлат ба ҳар кас, қатъи назар аз миллат, нажод, ҷинс, забон, эътиқоди динӣ, мавқеи сиёсӣ, вазъи иҷтимоӣ, таҳсил ва молу мулк, ҳуқуқу озодиҳоро кафолат медиҳад.

Мардон ва занон баробарҳуқуқанд (моддаи 17)

Дар раванди бунёди ҷомеаи пешрафта ва адолатпарвар масъалаи ташаккули маърифати ҳуқуқии шаҳрвандон нақши калидӣ дорад

Масъалаи дигари муҳим, ки дар низоми ҳуқуқии кишвар нақши калидӣ дорад, таъмини волоияти қонун буда, он меҳвари фаъолияти мақомоти ҳокимияти судӣ ва ҳифзи ҳуқуқ ба ҳисоб меравад

Таъмин намудани дастрасӣ ба адолати судӣ ва иттилоот оид ба фаъолияти судҳо, муҳокимаи ошкоро ва одилонаи судӣ ба таҳкими қонуният, пешгирӣ кардани содиршавии ҷиноят, эҳтиром ба қонун ва ҳифзи ҳуқуқу озодиҳои инсон ва шаҳрванд мусоидат менамояд

Баланд бардоштани сатҳи маърифати ҳуқуқӣ, таълим ва тарбияи ҳуқуқии шаҳрвандон яке аз самтҳои афзалиятноки сиёсати ҳуқуқии Ҷумҳурии Тољикистон маҳсуб ёфта, тавассути фаъолияти мақомоти давлатӣ, ташкилотҳо, шаҳрвандон ва ҷалби воситаҳои ахбори омма амалӣ мегардад

Таълим ва тарбияи ҳуқуқӣ ҷузъи ҷудонашавандаи сиёсати ҳуқуқии давлат буда, дар робита бо тарбияи сиёсӣ, ахлоқӣ, меҳнатӣ, эстетикӣ ва намудҳои дигари тарбияи инсон бояд анҷом дода шавад

Мақсад аз қабули қарор` дар бораи соли 2024 «Соли маърифати ҳуқуқӣ» эълон гардидан ин баланд бардоштани сатҳи маърифати ҳуқуқии шаҳрвандон, тарғиби арзишҳои демократӣ, мустаҳкам намудани ҳимояи ҳуқуқи инсон мебошад

Тарбияи шаҳрвандон дар рӯҳияи эҳтиром нисбат ба қонун ва таъмин намудани волоияти он, ба роҳ мондани усули ҳамкории самараноки давлат ва ниҳодҳои ҷомеаи шаҳрвандӣ дар самти маърифати ҳуқуқии шаҳрвандон аз ҷумлаи ҳадафҳои аслии «Соли маърифати ҳуқуқӣ» мебошад

Баланд бардоштани сатҳи маърифат ва шуури ҳуқуқии аҳолӣ, таълим ва тарбияи ҳуқуқии шаҳрвандон яке аз самтҳои муҳими сиёсати ҳуқуқии Ҷумҳурии Тоҷикистон маҳсуб мешавад

Баланд бардоштани сатҳи маърифати ҳуқуқии аҳолӣ омили асосии эъмори давлати ҳуқуқбқнёд, ҷомеаи шаҳрвандӣ ва таъмин намудани волоияти қонун мебошад

Таъмин намудани тартиботи ҳуқуқӣ, амнияти давлат,суботу оромии ҷомеа,ҳифзи ҳуқуқу озодиҳои инсон ва шаҳрванд,инчунин,мубориза бо ҷинояткорӣ вазифаи бевоситаи хизматӣ ва қарзи виҷдонии ҳар як корманди мақомоти ҳифзи ҳуқуқ ба ҳисоб меравад

Рушди давлати демократӣ, ҳуқуқбунёд ва дунявӣ ба сатҳи дониш ва маърифати ҳуқуқии аҳолӣ вобастагии зиёд дорад