26 июни соли 2024 дар шаҳри Алмаатои Ҷумҳурии Қазоқистон чорабинӣ бахшида ба сармоягузорӣ, рақобатпазирӣ ва тиҷорат дар Осиёи Марказӣ баргузор гардид, ки дар он муовини раиси Кумитаи андози назди Ҳукумати Ҷумҳурии Тоҷикистон Султон Бахтиёр иштирок намуд.

    Дар чорабинӣ намояндагони сохторҳои давлатӣ ва ҷонибҳои манфиатдор аз бахши давлатӣ ва хусусии ҷумҳуриҳои Тоҷикистон, Қазоқистон, Қирғизистон, Ӯзбекистон ва Туркманистон, инчунин намояндагони Иттиҳоди Аврупо (ИА), Маркази Байналмилалии Тиҷорат (МБТ) ва Созмони ҳамкории иқтисодӣ ва рушд (СҲИР) иштирок варзиданд.

    Дар ҷаласа мавзӯҳои зерин мавриди муҳокима қарор дода шуданд:

    1. Беҳтар намудани фазои соҳибкорӣ ва тиҷорати фаромарзӣ дар Осиёи Марказӣ.

    2. Баланд бардоштани рақобатпазирии бахши хусусӣ тавассути рақамикунонӣ.

    3. Амалҳои минбаъда: рушди робитаҳои тиҷоратӣ ва нақлиётӣ дар Осиёи Марказӣ.

    Зимни ҷаласа маълумот оид ба рушди рақамикунонӣ дар тӯли панҷ соли охир пешниҳод карда шуд. Мушкилиҳои мавҷуда ва роҳҳои ҳалли онҳо муҳокима шуданд. Инчунин самтҳои такмили минбаъдаи савдои фаромарзӣ дар Осиёи Марказӣ муҳокима карда шуд.

    Дар баромади худ муовини Раиси Кумитаи андоз Султон Бахтиёр иштирокчиёни вохӯриро бо натиҷаҳои чорабиниҳое, ки ба беҳтар намудани рақамикунонии маъмурикунии андоз дар Ҷумҳурии Тоҷикистон нигаронида шудаанд, шинос намуд. Таъкид гардид, ки Системаи ҳамгироии иттилоотии андози Кумитаи андоз ба шахсони воқеию ҳуқуқӣ имкон медиҳад, ки дар давоми 24 соат фаъолияти соҳибкориро ба таври электронӣ ба қайд гирифта, минбаъд пешниҳоди эъломияҳои андоз, таҳияи ҳисобнома-фактураҳо, пардохти андозҳо, аз ҷумла пешниҳоди аризаи барҳамдиҳиро бидуни ҳозир шудан ба мақомоти андоз анҷом диҳанд.

    Ҳамзамон, дар ҷаласа ҳадафҳои лоиҳаи Ready4Trade баррасӣ шуданд, ки он ба рушди тиҷорати дохилӣ ва байналмилалӣ дар Осиёи Марказӣ тавассути баланд бардоштани шаффофияти талаботҳои фаромарзӣ ва тақвият додани тиҷорати электронии фаромарзӣ равона шудааст.

Раёсати ҳамкории байналмилалии
Кумитаи андози назди
Ҳукумати Ҷумҳурии Тоҷикистон

    Кумитаи андоз дар ҳамбастагӣ бо Котиботи Механизми ҳамкорӣ дар соҳаи маъмурикунонии андоз дар доираи ташаббуси «Як камарбанд, як роҳ» (минбаъд - BRITACOM) санаи 29 майи соли 2024 дар чорчубаи 7-мин Рӯзи мавзӯии мудирияти андоз оид ба “Алоқаи беҳтарин барои ояндаи беҳтарин” семинари маҷозӣ дар мавзӯи низоми андозбандии Ҷумҳурии Тоҷикистон, сиёсат ва маъмурикунонии андоз (минбаъд - Семинар) баргузор намуд.

    Дар Семинар зиёда аз 160 намояндагон аз мақомоти андози давлатҳои аъзои BRITACOM, давлатҳои нозирони BRITACOM, созмонҳои байналмилалӣ ва молиявӣ, инчунин бахши хусусӣ, аз ҷумла аз Ҷумҳурии Мардумии Чин, Сербия, Нигерия, Тайланд, Италия, Сенегал, Иёлоти муттаҳидаи Америка, Покистон, Алҷазоир, Макаои Хитой, Тимор Лесте, Амороти Муттаҳидаи Араб, Гурҷистон, Гамбия, Непал, Сингапур, Панама, Филиппин, Гвинея, Арманистон, Серра-Леоне ва Индонезия иштирок варзиданд.

    Аз ҷониби Кумитаи андози назди Ҳукумати Ҷумҳурии Тоҷикистон дар семинар муовини якуми Раиси Кумитаи андоз - Солеҳзода Аюбҷон Маруф, муовини Раиси Кумитаи андоз - Маликзода Нарзулло ва дигар кормандони Кумитаи андоз иштирок намуданд.

    Ҳадафи асосии BRITACOM ин ташаккули муҳити андозбандии мусоид бо мақсади рушди соҳибкорӣ тавассути ҳамкорӣ ва табодули таҷрибаи пешқадам дар самти риояи волоияти қонун, баланд бардоштани эътимоднокии андоз, тезонидани ҳалли баҳсҳои андозӣ, беҳтар намудани хизматрасонӣ ба андозсупорандагон ва баланд бардоштани иқтидори мақомоти андоз дар давлатҳои шарикони ташаббуси «Як камарбанд, як роҳ» ба ҳисоб меравад.

    Маърӯзачиён, иштирокчиёнро бо тадбирҳои андешидашуда оид ба мавзӯъҳои “Рақамикунонии мақомоти андоз дар Ҷумҳурии Тоҷикистон”, “Трансформатсияи рақамии маъмурикунонии андоз ва гумрук”, “Рушди низоми андозбандии Ҷумҳурии Тоҷикистон”, ва “Такмили низоми идоракунии хавфҳо дар Ҷумҳурии Тоҷикистон” шинос намуда, ба саволҳои иштирокчиён вобаста ба андози иҷтимоӣ барои ғайрирезидентҳо, андоз аз даромади шахсони ҳуқуқӣ, низоми идоракунии хавфҳои Ҷумҳурии Тоҷикистон, рақамикунонии фаъолияти Кумитаи андоз, тадбирҳои мусоидаткунанда барои ҷалби андозсупорандагон ҷиҳати истифодаи хизматрасониҳои электронии мақомоти андоз ва дигар саволҳо ҷавобҳои мушаххас пешниҳод намуданд.

    Ҳамзамон, ба иштирокчиён намоиши маҷозӣ оид ба фаъолияти Кумитаи андоз, ки дар сомонаи BRITACOM тавассути истиноди мазкур https://www.britacom.org/zt/ThemeDay/SeventhEvent/ дастрас мебошад, пешниҳод гардид, ки дар он дастоварду комёбиҳои мақомоти андози Ҷумҳурии Тоҷикистон дар соҳаи рақамисозии маъмурикунонии андоз ба намоиш гузошта шудааст.

    Дар охири Семинар иштирокчиён миннатдории худро ба Кумитаи андоз ва Котиботи BRITACOM барои пешниҳоди маълумотҳои муфид оид ба низоми андозбандии Ҷумҳурии Тоҷикистон ва умед ба ҳамкории минбаъда изҳор намуданд.

Раёсати ҳамкории байналмилалии
Кумитаи андози назди
Ҳукумати Ҷумҳурии Тоҷикистон

Мутобиқи моддаи 69 Конститутсияи Ҷумҳурии Тоҷикистон фармон медиҳам:

1.Соли 2024 "Соли маърифати ҳуқуқӣ" эълон карда шавад.

2.Ҳукумати Ҷумҳурии Тоҷикистон ҷиҳати иҷрои фармони мазкур дар муҳлати як моҳ нақшаи чорабиниҳоро таҳия ва барои тасдиқ пешниҳод намояд.

Президенти

Ҷумҳурии Тоҷикистон      Эмомалӣ Раҳмон

ш. Душанбе,

аз 30 декабри соли 2023, № 668

   Бо мақсади иҷрои банди 3 нақшаи чорабиниҳо бахшида ба «Соли маърифати ҳуқуқӣ» эълон намудани соли 2024, ки бо амри Президенти Ҷумҳурии Тоҷикистон 18 марти соли 2024, №АП-533 тасдиқ шудааст, бо фармоиши вазири адлияи Ҷумҳурии Тоҷикистон аз 19 апрели соли 2024, №50 рамзи «Соли маърифати ҳуқуқӣ – 2024» тасдиқ карда шуд.

   Рамзи мазкур намуди доирашакл дошта, гирдогирди рамзро хати доирашакли сабз фаро гирифтааст, ки нишонаи сарсабзию шукуфоӣ, сарбаландиву хуррамӣ ва абадият мебошад.

   Дар гирди қисми болои рамз бо забони тоҷикӣ «Соли маърифати ҳуқуқӣ», ки ифодагари моҳияти рамз мебошад, навишта шуда, дар қисми поёни он рамзи шараф – шохи баргдори дарахти лавр бо тасмаи серахаи печида, ки ифодакунандаи рангҳои Парчами давлатии Ҷумҳурии Тоҷикистон мебошад, ҷой гирифтааст.

  Дар маркази доира ҷузъиёти асосии рамз – китоби кушода, офтоби оламоро ва тоҷдасти шоҳӣ ҷой дода шудааст. Китоби кушода таҷассумкунандаи манбаи дониш, Конститутсия ва қонун, таълиму тарбия ва хирад, офтоби оламоро – рамзи нур, гармӣ, шифо, саховатмандӣ ва тоҷдасти шоҳӣ бо тасвири нимдавраи офтобӣ ва ҳафт ситора ҳамчун рамзи ваҳдати миллӣ, иқтидори давлат ва роҳнамою равшанидиҳанда мебошад. Дар қисми поёни маркази доира рақами «2024» нишон дода шудааст.

Инсон, ҳуқуқ ва озодиҳои ў арзиши олӣ мебошанд.

Ҳаёт, қадр, номус ва дигар ҳуқуқҳои фитрии инсон дахлнопазиранд.

Ҳуқуқу озодиҳои инсон ва шаҳрвандро давлат эътироф, риоя ва ҳифз менамояд (моддаи 5)

Ҳуқуқу озодиҳои инсон ва шаҳрванд ба воситаи Конститутсия, қонунҳои ҷумҳурӣ ва санадҳои ҳуқуқии байналмилалие, ки аз тарафи Тоҷикистон эътироф шудаанд, ҳифз мегарданд (моддаи 14)

Ҳама дар назди қонун ва суд баробаранд. Давлат ба ҳар кас, қатъи назар аз миллат, нажод, ҷинс, забон, эътиқоди динӣ, мавқеи сиёсӣ, вазъи иҷтимоӣ, таҳсил ва молу мулк, ҳуқуқу озодиҳоро кафолат медиҳад.

Мардон ва занон баробарҳуқуқанд (моддаи 17)

Дар раванди бунёди ҷомеаи пешрафта ва адолатпарвар масъалаи ташаккули маърифати ҳуқуқии шаҳрвандон нақши калидӣ дорад

Масъалаи дигари муҳим, ки дар низоми ҳуқуқии кишвар нақши калидӣ дорад, таъмини волоияти қонун буда, он меҳвари фаъолияти мақомоти ҳокимияти судӣ ва ҳифзи ҳуқуқ ба ҳисоб меравад

Таъмин намудани дастрасӣ ба адолати судӣ ва иттилоот оид ба фаъолияти судҳо, муҳокимаи ошкоро ва одилонаи судӣ ба таҳкими қонуният, пешгирӣ кардани содиршавии ҷиноят, эҳтиром ба қонун ва ҳифзи ҳуқуқу озодиҳои инсон ва шаҳрванд мусоидат менамояд

Баланд бардоштани сатҳи маърифати ҳуқуқӣ, таълим ва тарбияи ҳуқуқии шаҳрвандон яке аз самтҳои афзалиятноки сиёсати ҳуқуқии Ҷумҳурии Тољикистон маҳсуб ёфта, тавассути фаъолияти мақомоти давлатӣ, ташкилотҳо, шаҳрвандон ва ҷалби воситаҳои ахбори омма амалӣ мегардад

Таълим ва тарбияи ҳуқуқӣ ҷузъи ҷудонашавандаи сиёсати ҳуқуқии давлат буда, дар робита бо тарбияи сиёсӣ, ахлоқӣ, меҳнатӣ, эстетикӣ ва намудҳои дигари тарбияи инсон бояд анҷом дода шавад

Мақсад аз қабули қарор` дар бораи соли 2024 «Соли маърифати ҳуқуқӣ» эълон гардидан ин баланд бардоштани сатҳи маърифати ҳуқуқии шаҳрвандон, тарғиби арзишҳои демократӣ, мустаҳкам намудани ҳимояи ҳуқуқи инсон мебошад

Тарбияи шаҳрвандон дар рӯҳияи эҳтиром нисбат ба қонун ва таъмин намудани волоияти он, ба роҳ мондани усули ҳамкории самараноки давлат ва ниҳодҳои ҷомеаи шаҳрвандӣ дар самти маърифати ҳуқуқии шаҳрвандон аз ҷумлаи ҳадафҳои аслии «Соли маърифати ҳуқуқӣ» мебошад

Баланд бардоштани сатҳи маърифат ва шуури ҳуқуқии аҳолӣ, таълим ва тарбияи ҳуқуқии шаҳрвандон яке аз самтҳои муҳими сиёсати ҳуқуқии Ҷумҳурии Тоҷикистон маҳсуб мешавад

Баланд бардоштани сатҳи маърифати ҳуқуқии аҳолӣ омили асосии эъмори давлати ҳуқуқбқнёд, ҷомеаи шаҳрвандӣ ва таъмин намудани волоияти қонун мебошад

Таъмин намудани тартиботи ҳуқуқӣ, амнияти давлат,суботу оромии ҷомеа,ҳифзи ҳуқуқу озодиҳои инсон ва шаҳрванд,инчунин,мубориза бо ҷинояткорӣ вазифаи бевоситаи хизматӣ ва қарзи виҷдонии ҳар як корманди мақомоти ҳифзи ҳуқуқ ба ҳисоб меравад

Рушди давлати демократӣ, ҳуқуқбунёд ва дунявӣ ба сатҳи дониш ва маърифати ҳуқуқии аҳолӣ вобастагии зиёд дорад

Санаи 15 марти соли 2024 вохӯрии Раиси Кумитаи андози назди Ҳукумати Ҷумҳурии Тоҷикистон Давлатзода Нусратулло Муқим бо роҳбари Миссияи Департаменти ҷамъоварии андозҳои Хазинаи Байналмилалии Асъор Стоян Марков (минбаъд - Миссия) баргузор гардид, ки дар он раванди татбиқи “Барномаи миёнамуҳлати даромадҳои давлатии Ҷумҳурии Тоҷикистон барои солҳои 2024-2029”, ки бо қарори Ҳукумати Ҷумҳурии Тоҷикистон аз 30 декабри соли 2023, №594 тасдиқ шудааст, муҳокима карда шуд.

Зимни вохӯрӣ ҷонибҳо масъалаҳои доир ба такмили низоми идоракунии хавфҳо, автоматикунонии раванди баргардонидани андоз аз арзиши иловашуда ва беҳтар намудани маъмурикунонии андозро мавриди баррасӣ қарор доданд.

Аъзои Миссия рӯзҳои аз 4 то 15 марти соли 2024 бо роҳбарият ва кормандони Кумитаи андоз вохӯриҳои судмандро баргузор намуда, аз натиҷаи он Ҳисобот оид ба «Пешниҳод намудани кӯмаки техникӣ барои Кумитаи андоз ҷиҳати татбиқи “Барномаи миёнамуҳлати даромадҳои давлатии Ҷумҳурии Тоҷикистон барои солҳои 2024-2029”-ро (минбаъд - Ҳисобот) манзур намуданд.

Бояд қайд намуд, ки дар Ҳисобот оид ба ҷоннок намудани корҳо дар самти назорати нархгузории трансфертӣ, гузаронидани ислоҳот дар назорати андозии андозсупорандагони калон ва таҳия намудани нақшаи мақсаднок барои давра ба давра таъмин намудани пардохти маблағҳои қарзи андоз гузашта таклифу пешниҳодҳо пешбинӣ шудаанд.

Раиси Кумитаи андоз муҳтарам Давлатзода Нусратулло Муким ба намояндагони Миссия барои ҳамкории мутақобилан судманд ва омода намудани Ҳисобот изҳори сипос намуд.

Мулоқот дар фазои ҳусни тафоҳум ба анҷом расида, ҷонибҳо натиҷаи вохӯриро хуб арзёбӣ намуданд.

Раёсати ҳамкории байналмилалии
Кумитаи андози назди
Ҳукумати Ҷумҳурии Тоҷикистон

Рӯзҳои 28-29 феврали соли 2024 дар шаҳри Тошкенти Ҷумҳурии Ӯзбекистон Форуми андозии “Роҳи абрешим” (минбаъд Форум) бо ташаббуси Маркази байналмилалии андоз ва сармоягузорӣ дар ҳамкорӣ бо Кумитаи андози назди Девони Вазирони Ҷумҳурии Ўзбекистон баргузор гардид, ки дар он аз ҷониби Кумитаи андози назди Ҳукумати Ҷумҳурии Тоҷикистон – муовини Раиси Кумитаи андоз – Султон Бахтиёр иштирок намуд.

Дар Форум беш аз 60 иштирокчӣ аз 11 давлати дунё, аз ҷумла коршиносони байналмилалӣ аз ҷумҳуриҳои Мардумии Чин, Қазоқистон, Ӯзбекистон, Туркия, Федератсияи Россия, Швейтсария, Иёлоти Муттаҳидаи Америка, Африқои Ҷанубӣ ва ҳайатҳои расмии давлатҳои Арманистон, Озарбойҷон, Гурҷистон, Муғулистон, Қазоқистон, Қирғизистон, Тоҷикистон, Туркия, Ҷумҳурии Мардумии Чин, Ӯзбекистон ва Япония ширкат варзиданд.

Тибќи рўзномаи љаласањои Форум коршиносони Маркази байналмилалии андоз ва сармоягузорӣ, намояндагони Вазорати иқтисод ва молияи Ҷумҳурии Ӯзбекистон ва Кумитаи андози назди Девони Вазирони Ҷумҳурии Ӯзбекистон, инчунин дигар намояндагони бахши давлатӣ ва хусусӣ мавзуъҳои вобаста ба рушди минтақавии иқтисодӣ ва омилҳои умумии сиёсати андозиву буҷетӣ, маъмурикунонии андозҳои ғайримустақим, ҳамоҳангсозии сиёсати савдо ва андоз бо мақсади рушди савдои минтақавӣ ва муқовимат ба савдои ғайриқонунӣ, истифодаи технология барои беҳтар намудани маъмурикунонии андоз, манфиатҳои истифодабарии тамғагузорӣ ва рамзгузории электронии маҳсулот ва пайгирии гардиши мол дар ҳамаи марҳилаҳои муомилот, инчунин андозбандии хизматрасониҳо дар иқтисодиёти рақамиро мавриди муҳокима қарор доданд.

Ҳамзамон, коршиносони байналмилалӣ оид ба тақвият додани мубориза бо саркашӣ аз пардохти андозҳо тавассути шомил шудан ба аъзогии шарикони давлатҳои BEPS, қоидаҳои умумиҷаҳонии мубориза бар зидди канораҷӯӣ аз пардохти андозҳо ва интиқоли фоида (GloBE), тиҷорати электронӣ, ҳалли мушкилоти иқтисоди рақамӣ, хавфҳои иҷро нагардидани қонунгузории андоз аз тарафи субъектҳои соҳибкории хурду миёна, дурнамои рушди иқтисодиёти ҷаҳонӣ, беҳтар намудани фазои сармоягузории давлатҳои минтақа ва дигар масъалаҳои мубрами андозбандии байналмилалӣ суханрониҳо намуда, масъалаҳои матраҳшударо мавриди муқокима қарор доданд.

Аз ҷониби Муовини Раиси Кумитаи андози назди Ҳукумати Ҷумҳурии Тоҷикистон ба иштирокчиёни Форум оид ба ислоҳотҳои қонунгузории андоз ва рушди рақамикунонии хизматрасониҳои давлатии мақомоти андози Ҷумҳурии Тоҷикистон маълумот манзур гардид.

Раёсати ҳамкории байналмилалии
Кумитаи андози назди
Ҳукумати Ҷумҳурии Тоҷикистон

Раиси Кумитаи андоз ба ҳайати Сафорат ҷиҳати ташриф овардан ба Кумитаи андоз изҳори миннатдорӣ намуда, аз ҳамкориҳои мутақобила судманди ду кишвар дар самти андозу андозбандӣ, табодули таҷриба ва маълумоти соҳавӣ ибрози қаноатмандӣ намуд.

Зимни вохӯрӣ, ҷонибҳо оид ба масъалаҳои гуногуни мубрами ҳамкориҳои дуҷонибаи Тоҷикистону Корея, инчунин доир ба масъалаҳои низоми андозбандӣ дар Ҷумҳурии Тоҷикистон, имтиёзҳои андозӣ, қонунгузории андози Ҷумҳурии Тоҷикистон, шумораи ширкатҳое, ки бо сармоягузории шахсони воқеӣ ва ҳуқуқии Ҷумҳурии Корея фаъолият менамоянд, ҳамчунин доир ба ҳамкориҳои минбаъдаи тарафҳо табодули афкор намуданд.

Аз ҷониби Сафир қайд гардид, ки соли 2023 байни Ҷумҳурии Тоҷикистон ва Ҷумҳурии Корея Созишномаи сармоягузорӣ ба имзо расонида шуд, ки он барои таъмини аҳолии Ҷумҳурии Тоҷикистон бо ҷойи корӣ мусоидат хоҳад кард.

Дар ҷамъбаст ҷонибҳо ба хулосае омаданд, ки бо мақсади беҳтар намудани муҳити сармоягузорӣ ва ҷалби ширкатҳои кореягӣ дар Ҷумҳурии Тоҷикистон минбаъд Сафорати Ҷумҳурии Корея дар Ҷумҳурии Тоҷикистон ва Кумитаи андози назди Ҳукумати Ҷумҳурии Тоҷикистон ҳамкориро ҷоннок намуда, ба ширкатҳои кореягӣ вобаста ба баррасӣ ва ҳалли масъалаҳои андозбандӣ ва маъмурикунонии андоз ҳамаҷониба мусоидат менамоянд.

Мулоқот дар фазои ҳусни тафоҳум ба анҷом расида, ҷонибҳо натиҷаи вохӯриро хуб арзёбӣ намуданд.

Раёсати ҳамкории байналмилалии
Кумитаи андози назди
Ҳукумати Ҷумҳурии Тоҷикистон