Мулоқот бо Дабири кулли Созмони Ҳамкории Иқтисодӣ Ҳодӣ Сулаймонпур

21 август дар шаҳри Гулистони вилояти Суғд Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Дабири кулли Созмони Ҳамкории Иқтисодӣ Ҳодӣ Сулаймонпурро ба ҳузур пазируфтанд.

Дар ҷараёни мулоқот ҷонибҳо вазъи феълӣ ва дурнамои муносибатҳои ҳамкории Ҳукумати Ҷумҳурии Тоҷикистон ва Созмони Ҳамкории Иқтисодиро мавриди баррасӣ қарор доданд.

Президенти мамлакат муҳтарам Эмомалӣ Раҳмон аз сатҳи имрӯзаи ҳамкорӣ дар бахшҳои тиҷорат, ҳамлу нақли транзитию нақлиётӣ, ҳамчунин таҳкими робитаҳои фарҳангиву гуманитарӣ, изҳори қаноатмандӣ карданд.

Таъкид гардид, ки Тоҷикистон барои рушди минбаъдаи ҳамкорӣ дар соҳаҳои тиҷорат, сармоягузорӣ, энергетика, нақлиёту коммуникатсия, саноат, кишоварзӣ, ҳифзи муҳити зист ва туризм бо кишварҳои аъзои Созмони Ҳамкории Иқтисодӣ манфиатдор аст.

Ҷонибҳо зимни мулоқот ҳамчунин масъалаҳои рушди туризми минтақавӣ, истиқрори сулҳу субот дар кишвари ҳамсояи Афғонистон, рушди иқтисодию иҷтимоии ин кишвар ва дигар мавзуъҳои мавриди таваҷҷуҳро муҳокима карданд.

Тағйироти кадрӣ

Имрӯз Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ҳайати роҳбарии як қатор вазорату идораҳо ва сохторҳои ҳифзи ҳуқуқу тартибот тағйироти кадрӣ ба амал бароварданд.

Дар бинои Ҳукумати Ҷумҳурии Тоҷикистон зимни мулоқоти Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо кадрҳое, ки ба вазифаҳои масъули хизмати давлатӣ ва низомӣ таъин гардиданд, таъкид гардид, ки ҳангоми интихоб ва ҷобаҷогузории кадрҳо ба таҷрибаи андӯхта, маҳорати кордонӣ, қобилияти ташкилотчигӣ, донистани забонҳои хориҷӣ, хизмати содиқонаву бенуқсон дар вазифаҳои қаблӣ ва дигар сифатҳои шахсии кадрҳои ҷавон бартарият дода мешавад.

Бо Фармонҳои Президенти Ҷумҳурии Тоҷикистон Самадзода Зикрихудо бо сабаби ба кори дигар гузаштанаш аз вазифаи Раиси ноҳияи Ишкошими Вилояти Мухтори Куҳистони Бадахшон озод ва Мирзозода Мусо Одинамуҳамад ба вазифаи Раиси ноҳияи Ишкошими Вилояти Мухтори Куҳистони Бадахшон таъин гардид.

Ҳамчунин, бо Фармонҳои Президенти Ҷумҳурии Тоҷикистон Пиракзода Ҳикматулло муовини якуми Фармондеҳи Қӯшунҳои сарҳадии Кумитаи давлатии амнияти миллии Ҷумҳурии Тоҷикистон – Сардори Сарситоди Қӯшунҳои сарҳадии Кумитаи давлатии амнияти миллӣ таъин гардида, ба вазифаи Сардори Раёсати Қӯшунҳои сарҳадии Кумитаи давлатии амнияти миллӣ дар ВМКБ, вилояти Суғд ва сардори Раёсати ақибгоҳи Қӯшунҳои сарҳадии Кумитаи давлатии амнияти миллӣ кадрҳои ботаҷриба, хатмкардагони ду ва ё зиёда муассисаи олии таълимоти низомии дохил ва хориҷи кишвар таъин гардиданд.

Бо Қарори Ҳукумати Ҷумҳурии Тоҷикистон Саидмуродзода Шоиста муовини Вазири нақлиёти Ҷумҳурии Тоҷикистон таъин гардид.

Тибқи Қарорҳои дигари Ҳукумати Ҷумҳурии Тоҷикистон Ғайбуллозода Толиб муовини якум ва Соҳибзода Маҳмадкарим – муовини Директори Муассисаи давлатии “Тоҷикфилм” таъин гардиданд.

Бо Амрҳои Президенти Ҷумҳурии Тоҷикистон Файзуллозода Шараф – муовини Котиби Шӯрои амният, Зуҳурзода Бахтиёр ва Раҳмонзода Ҷамшед – машваратчиёни Шӯрои амнияти Ҷумҳурии Тоҷикистон таъин гардиданд.

Зимни суҳбати самимӣ Пешвои миллат аз фаъолияти ҳар як хизматчии давлатӣ натиҷагирӣ намуда, онҳоро ба хизмати содиқона, поквиҷдонона ва ба нафъи давлату миллат истифода кардани нерӯи ақлониву таҷрибаи касбкарда даъват намуданд.

“Ҳукумати Ҷумҳурии Тоҷикистон баҳри тарбияи кадрҳои ҷавону болаёқат, бахусус дастгирии занон дар вазифаҳои масъули давлатӣ минбаъд низ таваҷҷуҳу ғамҳорӣ зоҳир менамояд” – таъкид намуданд Президенти Ҷумҳурии Тоҷикистон муҳтарам Эмомалӣ Раҳмон ва иброз доштанд, ки барои болоравиии мансабӣ, ташаккули таҷрибаи корӣ, нишон додани натиҷаҳои назаррас аз ҳар як кадр тақозо мегардад, ки бо таҷрибаву дониши андӯхта қаноат накарда, пайваста омӯзанд, бо техника ва технологияи муосир кор карданро дар мадди аввал гузошта, забонҳои хориҷиро аз бар намоянд. Ба рӯйдоду воқеаҳои ҷаҳони муосир баҳои объективӣ дода, таҷрибаи мустақилона қарор карданро доро бошанд.

Аввалин Форуми ҳамкории маъмурияти андоз дар доираи ташаббуси “Як камарбанд, як роҳ ”

         Санаи 18-20 апрели соли 2019 дар шаҳри Учжени Ҷумҳурии Мардумии Чин Аввалин Форуми ҳамкории маъмурияти андоз дар доираи ташаббуси “Як камарбанд – Як роҳ ” баргузор гардид. Ҷониби Тоҷикистонро дар ин Форум Раиси Кумитаи андози назди Ҳукумати Ҷумҳурии Тоҷикистон Давлатзода Нусратулло Муқим намояндагӣ намуд.

         18 апрели соли 2019 намояндагони 34 кишвари ҷаҳон Ёддошти тафоҳумро “Оид ба механизми ҳамкориҳо дар соҳаи маъмурикунонии андоз”, аз ҷумла Раиси Кумитаи андози назди Ҳукумати Ҷумҳурии Тоҷикисто аз номи Ҳукумати Ҷумҳурии Тоҷикистон, ба имзо расониданд.

         Механизм ба ташкили ҳамкорӣ оид ба хизматрасонӣ ба андозсупорандагон, танзими баҳсҳои андозӣ, беҳтар намудани маъмурикунонии андоз, пешгири намудани пинҳонкунии манбаъҳои андозбандӣ ва фоидаи андозбандишаванда (нақшаи BEPS), амалигардонии мубодилаи автоматии маълумоти молиявӣ (AEOI) тибқи стандартҳои байналмилалӣ равона карда шудааст.

         Чи тавре ки маълум гардид, механизми ҳамкориҳо дар соҳаи маъмурикунонии андоз дар доираи ташаббуси “Як камарбанд – Як роҳ” механизми ғайритиҷоратии байниҳукуматӣ буда, аз Шӯро, Котибот, Форум оид ба ҳамкорӣ дар соҳаи андоз, Иттиҳод оид ба мусоидат ба назорати андозбандӣ, инчунин Кумитаи коршиносӣ – машваратӣ иборат мебошад.

         Дар рафти Форум Раиси Шӯро - Комиссари Мақомоти давлатии андози Ҷумҳурии Мардумии Чин Ван Тсзюн тайъин шуда, ҳамзамон муовини Раиси Шӯро, шахсони масъули Котибот ва Раиси Иттиҳод интихоб гардиданд. 34 давлат ба ҳайси аъзои Шӯро, 22 мақомоти андоз ва созмонҳои байналмилалии механизм ба ҳайси нозир ва 11 мутахассиони варзида ба ҳайати Кумитаи коршиносӣ – машваратӣ дохил шуданд.

         Форуми мазкур намояндагони мақомоти андози 85 кишвар, 16 созмонҳои байналмилалӣ, инчунин намояндагони ҷомеаҳои соҳибкорӣ ва доираи илмиро ба ҳам гирд овард.

Раёсати ҳамкории байналмилалӣ ва андозбандӣ