Рӯзҳои 3-6 апрели соли 2023 дар шаҳри Алматои Ҷумҳурии Қазоқистон семинар дар мавзуи “Низоми баҳодиҳии ташхисии маъмурикунонии андоз (TADAT)” (минбаъд – Семинар) баргузор гардид.

Семинар бо ташаббуси Маркази минтақавии рушди иқтидор барои Қафқоз, Осиёи Марказӣ ва Муғулистони Хазинаи Байналмилалии Асъор баргузор гардида, дар он намояндагони ҷумҳуриҳои Ӯзбекистон, Тоҷикистон, Қазоқистон, Қирғизистон, Озарбойҷон, Арманистон, Муғулистон, Туркменистон ва Гурҷистон иштирок намуданд.

Дар Семинар гуруҳи мутахассисони Кумитаи андози назди Ҳукумати Ҷумҳурии Тоҷикистон дар ҳайати Қудратов Хуршед - сардори Раёсати маъмурикунонии андози Сарраёсати маъмурикунонии андоз, Мирмадов Хисрав - сардори Раёсати таҳлил ва коркарди маълумотҳои Сарраёсати баҳисобгирӣ ва таҳлили даромадҳо ва Рузимадов Умедҷон - мудири бахши андозбандии байналмилалии Раёсати ҳамкории байналмилалӣ иштирок намуданд.

Мақсад аз баргузории Семинар дар пешниҳоди маълумот ба иштирокчиён оид ба шарҳи низоми ташхисии баҳодиҳии TADAT ва баррасии таҷрибаи беҳтарини байналмилалӣ, ки дар методологияи TADAT қабул ва истифода мешавад, инчунин тартиб ва раванди дархости мақомоти андоз ҷиҳати гузаронидани ташхиси TADAT буд. TADAT ин як навъ низоми баҳодиҳии ташхисии маъмурикунонии андоз аст, ки бо истифода аз усулҳои объективӣ ва стандартӣ ҷиҳати арзёбии ҷиҳатҳои қавӣ ва заифи мақомоти андоз дар асоси меъёрҳои таҷрибаи пешқадами байналмилалӣ гузаронида мешавад.

Зимни баргузории Семинар намояндагони Кумитаи андоз доир ба натиҷаҳои бадастовардаи мақомоти андози Ҷумҳурии Тоҷикистон дар самти маъмурикунонии андоз ва тағйироту иловаҳо ба қонунгузории андоз маърӯзаҳо пешниҳод намуданд.

Дар анҷоми Семинар тести санҷишӣ гузаронида шуда, иштирокчиён, аз ҷумла намояндагони мақомоти андози Ҷумҳурии Тоҷикистон бо сертификати Котиботи TADAT сарфароз гардонида шуданд.

Санаи 7 апрели соли равон ҳайати намояндагони Иттиҳоди Аврупо таҳти роҳбарии Сафири Иттиҳоди Аврупо муҳтарам Раймундас Кароблис бо дархости мулоқоти арзи адаб ба Кумитаи андози назди Ҳукумати Ҷумҳурии Тоҷикистон ташриф оварданд.

Муовини якуми Раиси Кумитаи андози назди Ҳукумати Ҷумҳурии Тоҷикистон муҳтарам Солеҳзода Аюбҷон Маруф бо ҳайати Иттиҳоди Аврупо вохӯрӣ намуда, ҷиҳати ташриф овардан ба Кумитаи андоз изҳори миннатдорӣ намуд.

Зимни вохӯрӣ, ҷонибҳо вобаста ба қонунгузории андози Ҷумҳурии Тоҷикистон, имтиёзҳои андозиву гумрукӣ ба лоиҳаҳои грантие, ки аз ҷониби Иттиҳоди Аврупо маблағгузорӣ карда мешаванд, инчунин доир ба ҳамкориҳои минбаъдаи тарафҳо табодули афкор намуданд.

Ҳамзамон ҷиҳати татбиқи имтиёзҳои андозие, ки Кодекси андози Ҷумҳурии Тоҷикистон муқаррар намудааст, риояи талаботи санадҳои зерқонунии соҳа мавриди муҳокима қарор дода шуд.

Дар ҷамъбаст ҷонибҳо ба хулосае омаданд, ки аз ҷониби Кумитаи андози назди Ҳукумати Ҷумҳурии Тоҷикистон ба унвони татбиқкунандагони лоиҳаҳо, ки аз ҷониби Иттиҳоди Аврупо маблағгузорӣ карда мешаванд, мактуби тавзеҳотӣ омода ва пешниҳод карда мешавад.

Мулоқот дар фазои ҳусни тафоҳум ба анҷом расида, ҷонибҳо натиҷаи вохӯриро хуб арзёбӣ намуданд.

Рӯзҳои 25-31 марти соли ҷорӣ дар шаҳри Токиои Ҷопон семинари стратегии маъмурикунонии инноватсионии андоз (минбаъд - Семинар) баргузор гардид.

Семинар бо ташаббуси Бонки Осиёгии Рушд бо иштироки беш аз 80 намояндагон аз 30 давлатҳои минтақаи Осиё ва Уқёнуси Ором доир шуд.

Мақомоти андози Ҷумҳурии Тоҷикистонро дар Семинар муовини якуми Раиси Кумитаи андоз - Солеҳзода Аюбҷон Маруф муаррифӣ намуд.

Коршиносони байналмилалӣ ва намояндагони мақомотҳои андоз тибќи рўзномаи љаласањои Семинар мавзуъњои вобаста ба рақамикунонии фаъолияти мақомоти андоз, аз ҷумла идоракунии самараноки бақайдгирии андозсупорандагон бо истифода аз технологияҳои рақамӣ, баланд бардоштани маърифати ҳуқуқию андозии андозсупорандагон ва пешниҳоди хизматрасониҳо ба шаҳрвандон бо истифода аз воситаҳои рақамӣ, таҳлили электронии маълумот, истифодаи зеҳни сунъӣ дар мақомоти андоз ва ҷамъоварии маълумоти шахсони сеюм барои беҳтар намудани корҳои назоратӣ, ҳалли мушкилоти рақамикунонии иқтисодиёт ва нақши созмони Воситаи арзёбии ташхиси мақомоти андоз (TADAT) барои беҳтар намудани воридоти даромадҳо, навовариҳо дар самти татбиқи тадбирҳои BEPS-(мубориза бар зидди канораҷӯӣ аз пардохти андозҳо ва интиқоли фоида) мавриди муҳокима қарор доданд.

Дар семинари мазкур қайд карда шуд, ки пандемияи COVID-19 ба давлатҳои ҷаҳон таъсири манфӣ расонида, қарзи давлатҳо зиёд гардид ва дар баробари ин даромадҳои давлатӣ низ аз ҳисоби андозҳо коҳиш ёфтанд. Бинобар ин, хулоса карда шуд, ки бо мақсади ноил шудан ба Ҳадафҳои рушди устувор ба кишварҳои рӯ ба тараққӣ-аъзоёни Бонки Осиёгии Рушдро зарур аст, ки ба корҳо вобаста ба ҷалби захираҳои дохилӣ тавассути гузаронидани ислоҳотҳои андозӣ ва ҳамкории байналмилалии андозӣ боз ҳам тақвият диҳанд.

Чунин ташаббусҳои ислоҳотӣ, самтҳои гуногунро дар бар мегиранд, аз ҷумла баланд бардоштани меъёри андоз аз даромадҳои шахсоне, ки даромадҳои калон ба даст меоранд (андозбандии прогрессивӣ-афзоянда) бо назардошти ҳаҷми даромадҳо, густариши ҳамкориҳои байналмилалии андозӣ ва муосиркунонии маъмурикунонии андоз бо истифода аз технологияҳои рақамӣ барои беҳтар намудани риояи қонунгузории андоз.

Ҳадаф аз гузаронидани ислоҳоти маъмурикунонии андоз ин дар маҷмуъ рақамикунонии фаъолияти мақомоти андоз ҷиҳати таъмини даромадҳои давлатӣ мебошад. Татбиқи технологияҳои рақамӣ метавонад ба мақомоти андоз дар коҳиш додани хароҷоти амалиётӣ ва баланд бардоштани шаффофияти фаъолият кӯмак расонад, ки омили мазкур ба беҳтар гардидани иҷроиши қонунгузории андоз аз ҷониби андозсупоранда мусоидат менамояд.

8 апрел дар бинои Ҳукумати Ҷумҳурии Тоҷикистон Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Муовини якуми Сарвазир, Вазири корҳои хориҷии Ҷумҳурии Сербия Ивитса Дачичро ба ҳузур пазируфтанд.

Дар рафти мулоқот маҷмӯи васеи масоили ҳамкории Тоҷикистону Сербия баррасӣ гардид.

Президенти мамлакат муҳтарам Эмомалӣ Раҳмон таъкид доштанд, ки мо ҷонибдори густариши минбаъдаи робитаҳои дуҷониба дар тамоми соҳаҳои мавриди таваҷҷуҳи тарафайн ва таҳкими заминаи ҳуқуқии муносибатҳои ду кишвар ҳастем.

Дар ҷараёни мулоқот ҷонибҳо ба масъалаҳои таҳкими робитаҳои байнипарлумонӣ, тавсеаи ҳамкорӣ дар соҳаҳои тиҷорату иқтисод, сармоягузорӣ, энергетика, инчунин технология, сайёҳӣ ва кишоварзӣ таваҷҷуҳ зоҳир карданд.

Дар ин зимн ба роҳ мондани ҳамкорӣ дар бахшҳои фарҳангиву гуманитарӣ, аз ҷумла соҳаи маориф ва илм ҳамчун самти ояндадори муносибатҳои Тоҷикистону Сербия арзёбӣ гардид.

Дар рафти мулоқот ҷонибҳо ҳамчунин оид ба дигар мавзуъҳои мавриди таваҷҷуҳ гуфтугӯйи судманд анҷом доданд.

5 апрел Президенти Ҷумҳурии Озарбойҷон муҳтарам Илҳом Алиев бо сафари давлатӣ ба Ҷумҳурии Тоҷикистон ташриф оварданд.

Маросими истиқболи расмии меҳмони олимақом дар назди Қасри миллат баргузор гардид.

Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Президенти Ҷумҳурии Озарбойҷон муҳтарам Илҳом Алиевро гарму самимӣ истиқбол гирифта, ба болои шоҳсуфаи ифтихорӣ даъват карданд.

Маросими истиқбол бо гузориши командири қаровули фахрӣ, садо додани сурудҳои миллии ду кишвар, гузаштани сарони давлатҳо аз назди сафи қаровули фахрӣ, арзи эҳтироми меҳмони олимақом ба Парчами давлатии Тоҷикистон, шиносоӣ бо ҳайатҳои расмии ду ҷониб ҷараён гирифта, бо қадамзании мутантан гузаштани ҷузъу томҳои қаровули фахрӣ аз назди сарони ду давлат анҷом ёфт.

Ҳамчунин тибқи муқаррароти расмии маросими истиқболи сафарҳои давлатӣ ба ифтихори ташрифи Президенти Ҷумҳурии Озарбойҷон аз тупхонаҳо 21 маротиба шиллик паронда шуд.

1 апрел Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар маркази деҳоти Овчиқалъачаи ноҳияи Бобоҷон Ғафурови вилояти Суғд бо бардоштани парда аз рӯйи лавҳа майдони Парчами давлатиро ба истифода доданд.

Баландии сутунпояи Парчами давлатии Ҷумҳурии Тоҷикистон 50 метр, дарозии матоъ 14 ва паҳноиаш 7 метрро ташкил медиҳад.

Сохтмони майдони Парчами давлатӣ дар доираи омодагиҳо ба ҷашни 35 - солагии Истиқлоли давлатии Ҷумҳурии Тоҷикистон моҳи январи соли равон бо маблағгузории Мақомоти иҷроияи ҳокимияти давлатии ноҳияи Бобоҷон Ғафуров оғоз гардида, дар муддати кӯтоҳ мутобиқ ба талаботи лоиҳавӣ ба анҷом расонида шудааст.

Майдони Парчами давлатӣ дар маркази деҳоти Овчиқалъача 30 садякро ташкил намуда, дар он барои истироҳату фароғати шаҳрвандон мутобиқ ба талабот шароит фароҳам оварда шудааст.

Сокинони ин деҳоти дурдасти мамлакат бунёду ба истифода додани иншооти нав, таъсиси ҷойҳои нави корӣ ва тадриҷан беҳтаршавии сатҳи зиндагиро ба дастгириву таваҷҷуҳи доимии Роҳбари давлат марбут медонанд.

Дар майдони Парчами давлатӣ гулу буттаҳои ороишӣ шинонида шуда, барои шаҳрвандон нишастгоҳҳо насб карда шудааст. Фаввораҳо зебогии атрофи иншоотро афзун намудааст. Барои гашту гузор ва фароғати доимии сокинон равшании маркази деҳот ба инобат гирифта шудааст.

Пешвои муаззами миллат муҳтарам Эмомалӣ Раҳмон бунёду ба истифода додани Майдони Парчами давлатиро ба самараи Истиқлолияти давлатӣ ва ваҳдату ягонагӣ марбут дониста, масъулони дахлдорро барои ҳамин гуна ободу зебо нигоҳ доштани атрофи муқаддасоти миллӣ вазифадор намуданд.

Ҳамзамон дар доираи тадбирҳои ободонӣ ба масофаи 10 километр роҳҳои ҳудуди Ҷамоати деҳоти Овчиқалъачаи ноҳияи Бобоҷон Ғафуров бо маблағгузории Мақомоти иҷроияи ҳокимияти давлатии вилояти Суғд асфалтпӯш карда шудааст.