«Мақсади асосии сиёсати андозу буҷет сафарбар намудан ва самаранок истифода бурдани захираҳои молияи давлатӣ ҷиҳати ноилшавӣ ба ҳадафҳои рушди иҷтимоиву иқтисодии кишвар мебошад»
Эмомалӣ Раҳмон
  • Хабарҳои охирин
  • Эълонҳо
  • Ҷойхои кори

Резаахбор Оид ба натиҷаҳои Форуми андозӣ ва сармоягузорӣ “Роҳи абрешим”

18 март 2023 с.

Рӯзҳои 22-23 феврали соли 2023 дар шаҳри Алмаатои Ҷумҳурии Қазоқистон Форуми андозӣ ва сармоягузорӣ “Роҳи абрешим” (минбаъд Форум) бо ташаббуси Маркази байналмилалии андоз ва сармоягузорӣ дар ҳамкорӣ бо Кумитаи даромадҳои давлатии Вазорати молияи Ҷумҳурии Қазоқистон баргузор гардид, ки дар он беш аз 100 иштирокчӣ аз 14 кишварҳои дуру наздик ширкат варзиданд.

Дар Форум аз ҷониби Кумитаи андози назди Ҳукумати Ҷумҳурии Тоҷикистон Муовини Раиси Кумитаи андоз – Раҳимзода Абдусалом (роҳбари ҳайат) ва муовини сардори Раёсати ҳамкории байналмилали –Хайриддинов Умедҷон иштирок намуданд. .

Бояд қайд намуд, ки Маркази байналмилалии андоз ва сармоягузорӣ (минбаъд Марказ) созмони мустақили ғайритиҷоратии тадқиқотӣ ва таълимӣ буда, бо мақсади пешбурди ислоҳоти андозӣ ва ташаббусҳои давлативу хусусӣ барои беҳтар намудани фазои сармоягузорӣ дар кишварҳои рӯ ба тараққӣ таъсис дода шудааст. Ситод-қароргоҳи Марказ дар шаҳри Вашингтони Иёлоти Муттаҳидаи Америка воқеъ буда, намояндагии минтақавии худро дар давлатҳои ҷаҳон, аз ҷумла дар Ҷумҳурии Қазоқистон таъсис дода аст. Марказ табодули таҷрибаи байналмилалиро дар самти андозбандӣ ва сармоягузорӣ ба роҳ монда, тавассути дастгирии созмонҳои молиявии байналмилалӣ бо мақомотҳои андоз ва молияи 85 давлатҳои ҷаҳон ҳамкорӣ менамояд.

Ҳамасола, Марказ дар ҳамбастагӣ бо мақомотҳои андоз ва молияи давлатҳои дахлдор Форуми андозии Авруосиёро ташкил ва баргузор намуда, иштирокчиёни Форуми зикргардида масъалаҳои сиёсат ва маъмурикунонии андоз, ҳалли масъалаҳои андозӣ ва навовариҳои андозиро мавриди муҳокима қарор медиҳанд. Мавриди зикр аст, ки дар Форум њайатҳои расмии давлатҳои Гурҷистон, Муғулистон, Қазоқистон, Қирғизистон, Тоҷикистон ва Ӯзбекистон, инчунин намояндагони бахши хусусӣ ва коршиносони байналмилалӣ аз ҷумҳуриҳои Озарбойҷон, Қазоқистон, Халқии Хитой, Туркиё, Федератсияи Россия, Швейтсария, Шоҳигарии Нидерланд, Иёлоти Муттаҳидаи Америка ва Африқои Ҷанубӣ иштирок намуданд. Намояндагони Вазорати иқтисоди миллии Ҷумҳурии Қазоқистон, Кумитаи даромадҳои давлатии Вазорати молияи Ҷумҳурии Қазоқистон, коршиносони Маркази байналмилалии андоз ва сармоягузорӣ ва дигар намояндагони бахши хусусӣ тибќи рўзномаи љаласањои Форум мавзуъњои вобаста ба рушди минтақавии иқтисодӣ ва омилҳои умумии сиёсати андозиву буҷетӣ, маъмурикунонии андозҳои ғайримустақим, ҳамоҳангсозии сиёсати савдо ва андоз бо мақсади рушди савдои минтақавӣ ва муқовимат ба савдои ғайриқонунӣ, истифодаи технология барои беҳтар намудани маъмурикунонии андоз, манфиатҳои истифодабарии тамғагузорӣ ва рамзгузории электронии маҳсулот ва пайгирии маҳсулотҳо дар ҳамаи марҳилаҳои муомилот, инчунин андозбандии хизматрасониҳо дар иқтисодиёти рақамӣ мавриди муҳокима қарор доданд.

Ҳамчунин, коршиносони байналмилалӣ оид ба навовариҳо дар самти татбиқи тадбирҳои мубориза бар зидди канораҷӯӣ аз пардохти андозҳо ва интиқоли фоида дар доираи BEPS, тиҷорати электронӣ, ҳалли мушкилоти иқтисоди рақамӣ, таҳияи Кодекси андози Ҷумҳурии Қазоқистон дар таҳрири нав, пешниҳоди эъломияҳои андозӣ вобаста ба даромадҳо ва молу мулк аз тарафи аҳолии Қазоқистон дар солҳои минбаъда, хавфҳои иҷро нагардидани қонунгузории андоз аз тарафи соҳибкории хурду миёна, дурнамои рушди иқтисодиёти ҷаҳонӣ, беҳтар намудани фазои сармоягузории давлатҳои минтақа ва дигар масъалаҳои мубрами андозбандии байналмилалӣ суханрониҳо намуда, масъалаҳои матраҳшударо мавриди муқокима қарор доданд. Зимни муҳокимарониҳо оид ба масъалаҳои номбурда аз ҷониби ҳайати Кумитаи андоз ба коршиносони байналмилалӣ оид ба татбиқи тадбирҳо дар доираи BEPS, роҳҳои ҳалли мушкилотҳо дар самти тиҷорати электронӣ, андозбандии ширкатҳои фаромиллӣ ва тамғагузории маҳсулот саволҳо пешниҳод намуд. Ҳамзамон, ҳайати Кумитаи андоз ба иштирокчиёни Форум оид ба ислоҳотҳои қонунгузории андоз ва рушди рақамикунонии хизматрасониҳои давлатии мақомоти андози Ҷумҳурии Тоҷикистон маълумоти мухтассар манзур гардид.

Ифтитоҳи бинои нави маъмурии Нозироти андоз дар ноҳияи Синои шаҳри Душанбе

13 март 2023 с.

13 март Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ бо бардоштани парда аз рӯйи лавҳаи рамзӣ бинои нави маъмурии Нозироти андоз дар ноҳияи Синои шаҳри Душанберо мавриди истифода қарор доданд.

Иншооти навбунёд аз таҳхона ва 5 ошёна иборат буда, дар ошёнаи якум толори хизматрасонӣ ба шаҳрвандон, андозсупорандагон ва маҷлисгоҳ бо 120 ҷойи нишаст ҷойгир мебошад.

Ҳамчунин дар ошёнаҳои болоӣ ду маҷлисгоҳи дигар барои 100 нафар, бойгонӣ ва дигар ҳуҷраҳои хизматрасонӣ сохта шудааст. 

Бинои Нозироти андоз дар ноҳияи Сино дар доираи тадбирҳои созандагӣ ба истиқболи ҷашни 35-солагии Истиқлолияти давлатии Ҷумҳурии Тоҷикистон бунёд гардида, дар он барои 110 нафар корманди соҳа, шахсони воқеӣ, ҳуқуқӣ, соҳибкорони инфиродӣ ва андозсупорандагон шароити хуби кору хизматрасонӣ фароҳам оварда шудааст.

Масоҳати умумии иншоот 30 садяк заминро ташкил намуда, корҳои сохтмонӣ дар он соли 2021 оғоз гардида буд.

Фармоишгари иншоот Кумитаи андози назди Ҳукумати Ҷумҳурии Тоҷикистон ва паймонкор Ҷамъияти дорои масъулияти маҳдуди "Мега Техника Иншоот" мебошад.

Дар бинои тозабунёд 40 ҳуҷраи корӣ мавҷуд мебошад, ки ҳар яки он бо мизу курсӣ ва таҷҳизоти муосир муҷаҳҳаз карда шудааст. 

Насби дастгоҳу таҷҳизот ва барномаҳои муосири соҳавӣ имкон медиҳад, ки шафофияти фаъолияти нозироти андоз дар муносибат бо андозсупорандагон таъмин карда шуда, бидуни омили инсонӣ ва бо сарфаи вақт пешниҳоду гирифтани маълумот оид ба фаъолияти молиявию уҳдадориҳои андозсупорӣ анҷом дода шавад.

Ҳамзамон соҳибкорон имкон пайдо намуданд, ки бо истифода аз шабакаи интернет эъломияҳои худро ба тариқи электронӣ пешниҳод намоянд, санадҳои муқоисавӣ тартиб диҳанд, ҳисобварақаи худро аз назар гузаронанд, бо санадҳои меъёрии ҳуқуқии қонунгузории андоз, ки дар сомонаи Кумитаи андоз ҷойгир карда шудаанд, шинос шаванд.

Бинои нави маъмурии Нозироти андоз дар ноҳияи Синои шаҳри Душанбе бо тарҳу услуби хоси меъморӣ бунёд карда шуда, ҳамзамон саҳни он бо гулу бутта ва ниҳолҳои ороишию сояафкан ободу зебо гардонида шудааст.

Сарвари давлат муҳтарам Эмомалӣ Раҳмон зимни шиносоӣ бо шароити фароҳамгардида дар ин бино ба роҳбарият ва кормандон ҷиҳати боз ҳам беҳтару хубтар ба роҳ мондани сатҳу сифати хизматрасонӣ ба андозсупорандагон дастуру маслиҳатҳои муфид  доданд.

Кормандони Нозироти андоз дар ноҳияи Сино ба Президенти Ҷумҳурии Тоҷикистон муҳтарам Эмомалӣ Раҳмон ҷиҳати таваҷҷӯҳ ва дастгирҳои ҳамешагиашон нисбат ба кормандони мақомоти андоз изҳори сипосу миннатдорӣ карда, бинои навбунёдро дар арафаи ҷашни байналмилалии Наврӯз туҳфаи арзишманди Ҳукумати Ҷумҳурии Тоҷикистон арзёбӣ намуданд.

Ҳамкории Федератсияи Россия оид ба такмили низоми маъмурикунонии андози Ҷумҳурии Тоҷикистон

10 март 2023 с.

Рӯзҳои 2 – 3 марти соли ҷорӣ Раиси Ҳукумати Федератсияи Россия муҳтарам Михаил Мишустин бо сафари расмӣ ба Ҷумҳурии Тоҷикистон ташриф овард.

Зимни сафари Раиси Ҳукумати Федератсияи Россия миёни Тоҷикистону Россия 9 санади ҳамкорӣ ба имзо расиданд, ки доираи гуногуни муносибатҳо миёни ду кишвар, аз ҷумла маориф, тиб, нафақа, сайёҳӣ, молия, иқтисод ва варзишро фаро мегиранд. Маросими имзо дар ҳузури сарвазирони Тоҷикистону Россия, Қоҳир Расулзода ва Михаил Мишустин баргузор гардид.

Ҳамин тавр, дар доираи ба имзорасонии санадҳои дуҷониба миёни давлатҳо Созишнома байни Вазорати молияи Ҷумҳурии Тоҷикистон ва Вазорати молияи Федератсияи Россия дар бораи аз ҷониби Федератсияи Россия расонидани кумаки беподоши техникӣ ба Ҷумҳурии Тоҷикистон бо мақсади рушд ва такмили низоми маъмурикунонии андоз ба имзо расид.

Созишномаи мазкур бо мақсади татбиқи протоколҳои 17-ум ва 18-уми Комиссияи байниҳукуматӣ оид ба ҳамкории иқтисодӣ байни Федератсияи Россия ва Ҷумҳурии Тоҷикистон ба имзо расонида шудааст.

Тибқи Созишномаи мазкур ҷониби Россия дар солҳои 2023-2025 ба Ҷумҳурии Тоҷикистон бо мақсади рушд ва такмили низоми маъмурикунонии андоз кумаки техникии беподош пешниҳод менамояд.

Хадамоти андози Федератсия Россия мутобиқи Созишнома бо мақсади расидан ба ҳадафҳои дар “Барномаи рушди маъмурикунонии андоз дар Ҷумҳурии Тоҷикистон барои солҳои 2020-2025” пешбинишуда, тадбирҳои зеринро амалӣ менамояд:

- таҷдиди бизнес - равандҳои маъмурикунонии андоз;

- азнавкунии ҷузъҳои низоми мавҷудаи иттилоотӣ, таъсиси платформаи таҳлилӣ ва воситаҳои таҳлилии коркарди маълумоти ҳисобнома-фактураҳо бо мақсади беҳтар намудани маъмурикунонии андоз аз арзиши иловашуда;

- таҳияи Консепсияи такмили андозбандии амволи манқул ва ғайриманқул дар Ҷумҳурии Тоҷикистон;

- таҳияи тавсияҳо оид ба такмили заминаи меъёрии ҳуқуқии маъмурикунонии андоз ва ғайраҳо;

Қабули эътимоднома аз сафирони нави Иёлоти Муттаҳидаи Амрико, Туркия, Қатар, Молдова, Ирландия, Португалия, Кипр, Чили, Уганда ва Зеландияи Нав

9 март 2023 с.

9 март дар Қасри миллат Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз сафирони нави фавқулодда ва мухтори кишварҳои хориҷ эътимоднома қабул карданд.

Зимни маросим ба Президенти Ҷумҳурии Тоҷикистон муҳтарам Эмомалӣ Раҳмон сафирони фавқулодда ва мухтори Иёлоти Муттаҳидаи Амрико Мануел Микаллер, Туркия Умут Аҷар, Давлати Қатар Муборак Абдураҳмон Муборак ал-Наср, Ҷумҳурии Молдова Лилиан Дарий, Ҷумҳурии Ирландия Брайан Макэлдафф, Португалия хонум Мария Мадалена Лобу Карвалю Фишер, Ҷумҳурии Кипр Кипрос Йоргалис, Ҷумҳурии Чилӣ Эдуардо Эскобар, Ҷумҳурии Уганда Муҳаммад Тезикуба Кисамбира ва Зеландияи Нав хонум Сари Мэри Уолш, эътимодномаҳоро бо паёму дуруд аз роҳбарияти кишварҳои хеш тақдим карданд.

Пешвои миллат муҳтарам Эмомалӣ Раҳмон зимни суханронӣ ҳамаи сафиронро ба муносибати таъин гардиданашон ба ин маснади сермасъул дар Ҷумҳурии Тоҷикистон самимона табрику таҳният гуфта, бо итминон иброз доштанд, ки фаъолияти самараноки онҳо омили муассири рушду таҳкими муносибатҳои дӯстӣ ва ҳамкориҳои гуногунсоҳа байни кишварҳо хоҳад гардид.

Президенти мамлакат муҳтарам Эмомалӣ Раҳмон таъкид намуданд, ки давлати мо тӯли солҳои соҳибистиқлолӣ бо доираи васеи ҷомеаи олам ҳамкориҳои судманду баробарҳуқуқро дар ҳама соҳаҳои мавриди таваҷҷуҳ ба роҳ монда, пайгирона густариш медиҳад.

Сарвари давлат изҳори умед карданд, ки кишварҳои мо - бо такя ба ғояҳои волои умумибашарӣ - минбаъд низ робитаҳои дӯстӣ ва ҳамкориҳои судманди худро боз ҳам тақвият бахшида, густариш хоҳанд дод.

Таъкид гардид, ки Ҷумҳурии Тоҷикистон, дар асоси Консепсияи сиёсати хориҷии худ ҷиҳати таҳкими муносибатҳои дӯстӣ ва пешбурди ҳамкориҳои судманд бо ҳамаи кишварҳои ҷаҳон кӯшишҳои пайваста ба харҷ медиҳад.

Пешвои миллат муҳтарам Эмомалӣ Раҳмон оид ба рушду таҳкими робитаҳои дӯстӣ ва ҳамкории гуногунҷанбаи судманди Тоҷикистон бо Иёлоти Муттаҳидаи Амрико, Туркия, Давлати Қатар, Ҷумҳурии Молдова, Ҷумҳурии Ирландия, Португалия, Ҷумҳурии Кипр, Ҷумҳурии Чили, Ҷумҳурии Уганда ва Зеландияи Нав андешаронӣ карданд.

Президенти мамлакат омодагии Тоҷикистонро ҷиҳати бо иқдомҳои мушаххас ғанӣ гардонидани мазмуну муҳтавои муносибатҳои кишварҳо дар соҳаҳои мухталифи мавриди таваҷҷуҳи тарафайн, ки дорои зарфиятҳои зиёди ҳанӯз истифоданашуда мебошанд, таъкид намуданд.

Дар охири суханронӣ Пешвои миллат муҳтарам Эмомалӣ Раҳмон барои дастгирии ташаббусҳои ҷаҳонии Тоҷикистон оид ба ҳалли мушкилоти обу иқлим изҳори сипос карда, бори дигар ба ҳамаи сафирон ба муносибати оғози фаъолияташон барору комёбӣ орзу намуданд ва омодагии Ҳукумати Ҷумҳурии Тоҷикистонро ҷиҳати мусоидати ҳамаҷониба дар иҷрои рисолати дипломатиашон иброз доштанд.

Маводҳои видеоӣ

Дигар видеоҳо
0:00
/