Ташрифи кории коршиносони Бонки Ҷаҳонӣ ба Кумитаи андози назди Ҳукумати Ҷумҳурии Тоҷикистон дар доираи кӯмаки техникӣ оид ба татбиқи амалии барномаи идоракунии хавфҳои андозӣ

Рӯзҳои 7 - 11 августи соли равон коршиноси байналмилалии Бонки Ҷаҳонӣ Халед Ал-Корек дар доираи Барномаи кӯмаки техникӣ, ки аз тарафи Бонки Ҷаҳонӣ маблағгузорӣ карда мешавад, ба Кумитаи андози назди Ҳукумати Ҷумҳурии Тоҷикистон ташриф овард.

Мақсади ташриф ин ҳамкорӣ бо мутахассисони Кумитаи андоз ҷиҳати мусоидат намудан ба рушди минбаъдаи Барномаи идоракунии хавфҳои андозӣ буда, аз ҷумла самтҳои зеринро дар бар мегирифт:

- гузаронидани ҷаласаҳо барои муҳокима ва табодули маълумот оид ба системаи идоракунии хавфҳо: аудит, механизми баргардонидани андоз аз арзиши иловашуда, интихоби андозсупоранда дар асоси таҳлили хавфҳо, инчунин идоракунии қарз, системаи дастгоҳҳои назоратӣ хазинавӣ ва ғайра;

- муҳокимаи тартиботи ҷорӣ ва таҷрибаи байналмилалӣ.

Вохӯрии мазкур бо ташаббуси Кумитаи андози назди Ҳукумати Ҷумҳурии Тоҷикистон бо мақсади муаррифии модули нави компютерии «Интихоби субъектҳо барои мақсадҳои аудитӣ дар асоси таҳлили хавф» ташкил карда шудааст.

Солеҳзода Аюбҷон Маъруф, муовини якуми Раиси Кумитаи андоз дар доираи таҳия ва татбиқи методологияи хавфҳо ва модули нав баромад намуда, маълумотҳои заруриро ба таваҷҷуҳи коршиносон расонид.

Қобили зикр аст, ки ҷорӣ намудани технологияҳои рақамӣ метавонад ба мақомоти андоз барои коҳиш додани хароҷоти амалиётӣ ва баланд бардоштани шаффофияти фаъолият мусоидат намояд ва дар навбати худ иҷрои қонунгузории андозро аз ҷониби андозсупорандагон беҳтар созад.